Azərbaycan Müdafiə Nazirliyi Ermənistan tərəfinin Azərbaycan ordusu ilə üzbəüz mövqelərinə artilleriya qurğuları və əlavə şəxsi heyət cəmləşdirdiyini açıqlayıb.
Müdafiə Nazirliyinin yaydığı xəbərə görə, 16 oktyabrda günün ikinci yarısında Ermənistan Silahlı Qüvvələrinin Daşkəsən istiqamətində yerləşən Azərbaycan Silahlı Qüvvələrinin bölmələri ilə üzbəüz mövqelərinə hərbi nəqliyyat vasitələri ilə əlavə şəxsi heyət və 4 ədəd artilleriya qurğusunu cəmləşdirdiyi müşahidə edilib.
Müdafiə Nazirliyi yarana biləcək gərginliyə görə bütün məsuliyyətin Ermənistanın hərbi-siyasi rəhbərliyinin üzərinə düşdüyünü bəyan edib.
Nə baş verib: Ermənistan tərəfi Azərbaycan ordusunun 16 oktyabrda Ermənistan silahlı qüvvələrinin bölmələrinə atəş açdığı ilə bağlı xəbər yayıb. Həmin xəbəri Azərbaycan Müdafiə Nazirliyi təkzib edib.
Medialar nə yazır: Azərbaycan hökumətinə yaxın olan ARB24 kanalı 2 gündür ki, cəbhədə vəziyyətin gərginləşməsi və Azərbaycan ordusunun mümkün hərbi əməliyyatı barədə sujetlər hazırlayır.
