İşgəncələrə qarşı mübarizə təşkilatı “Empathy” Gürcüstanın keçmiş prezidenti, hazırda həbsdə olan Mixail Saakaşvilinin səhhəti ilə bağlı hesabat yayıb. OC Media yazır ki, təşkilat Saakaşvilinin ölkə xaricində tibbi yardım almalı olduğu, əks halda ölə biləcəyi barədə xəbərdarlıq edib.
Bəyanatda nə deyilir: Təşkilat sabiq prezidentin həbsdən əvvəl sağlam olduğunu, hazırda 20-dən çox simptomdan əziyyət çəkdiyini bildirib:
Onda səbəbi bilinməyən qızdırma, iştahsızlıq, sürətli arıqlama, əzələlərdə, oynaqlarda, sümüklərdə ağrıları, eyni zamanda bədənində qabıqlar və cızıqları, əzələ atrofiyası var.
qeyd olunub
Bəyanatda o da bildirilib ki, Saakaşvilinin indi müalicə aldığı xəstəxanada tam toksikoloji müayinənin keçirilməsi qeyri-mümkün hesab olunur və o, həmin xəstəxanada, həmçinin həbsdə qala bilməz:
Mixail Saakaşvili dərhal həbsdən azad edilib təcili şəkildə ABŞ-dakı üçüncü dərəcəli universitet xəstəxanasına köçürülməli, yaxud diaqnostika və müalicə üçün Aİ-yə göndərilməlidir.
bəyanatda deyilir
Təşkilat vurğulayıb ki, zəhərli maddələrin, kimyəvi birləşmələrin və radioaktiv maddələrin mövcudluğu vaxtında yoxlanılmalıdır. Əks halda Saakaşvili koma və ölüm riski ilə üz-üzə qala bilər.
Saakaşvili həbsdə hansı addımları atıb: Keçmiş prezident 2021-ci ilin oktyabrında həbs olunduqdan sonra iki dəfə aclıq aksiyası keçirib. O, ilk dəfə 50 gün aclıq aksiyası keçirib və noyabrın 19-da Gürcüstanın Qori şəhərindəki xəstəxanaya köçürüldükdən sonra buna son qoyub. Növbəti dəfə isə fevralın 23-də aclıq aksiyasına başlayıb və 15 gün sonra dayandırıb. Saakaşvilinin vəziyyətinin pisləşməsi ilə bağlı xəbərlər yayıldıqdan sonra mayın 12-dən Tbilisidəki “Vivamedi” klinikasında müalicəsinə başlanıb.
Siyasi reaksiya necə olub: Mixail Saakaşvilinin səhhəti ölkədə siyasi spekulyasiyalara səbəb olub. Belə ki, hakim “Gürcü Arzusu” partiyasının liderləri onun aclıq aksiyası edərək sağlamlığına zərər vurduğunu və bu səbəbdən səhhətində problemlər yarandığını deyiblər.
Saakaşvili niyə həbs olunub: O, 2021-ci il sentyabrın 29-da gizli şəkildə Ukraynadan Gürcüstana qayıdıb və oktyabrın 1-də saxlanılıb. Ona qarşı “vəzifə səlahiyyətlərindən sui-istifadə” və vəzifədə olduğu müddətlə bağlı bir sıra digər ittihamlar irəli sürülüb. Əksər məhkəmə iclaslarında iştirak edə bilməyən Saakaşvili 6 il müddətinə azadlıqdan məhrum edilib.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
