4 iyulda, Ələsgər Məmmədli barəsindəki həbs qətimkan tədbirinin uzadıldığı gün media eksperti pis rəftara məruz qalıb.
Bu barədə o, qardaşı Nəsimi Məmmədli ilə görüşü zamanı məlumat verib.
“Maşından düşürüləndə əlləri arxadan qandallanıb. Məhkəmə binasında özünü pis hiss edib. Su içmək üçün qollarının açılmasını tələb edib. 2 saat məhkəmədə əlləri arxadan qandallı şəkildə otaqda tək saxlanıb”.
Məlumatı jurnalist Gülzar Məmmədli yayıb
Məlumatda bilrilir ki, yalnız dəfələrlə tələb etdikdən sonra ona su içmək üçün icazə verilib və bu yalnız naməlum telefon zəngi gələndən sonra baş tutub.
Nə baş verib: 4 iyulda Xətai Rayon Məhkəməsində “Toplum işi” üzrə həbs olunan şəxslər barəsində həbs-qətimkan tədbirinin uzadılması ilə bağlı istintaq orqanın vəsatətinə baxılıb və məhkəmə vəsatəti təmin edib.
Məhkəmənin qərarı ilə ToplumTV-nin təsisçisi Ələsgər Məmmədlinin həbs müddəti daha 3 ay uzadılıb.
Onun vəkili Aqil Layıc bildirib ki, Ə. Məmmədlinin səhhəti stabil-ağır olaraq qalır. Onun qalxanabənzər vəzindəki şişlərlə əlaqədar yalnız boğazının sol tərəfindən biopsiya götürülüb. Ancaq böyük şiş sağ tərəfdə yerləşir.
“Toplum işi” nədir: Bu, Azərbaycanda fəaliyyət göstərən müstəqil internet televiziyası olan Toplum TV-yə qarşı başlanan cinayət işinə verilən addır. Bu cinayət işi ilə ümumilikdə 5 nəfər – Əli Zeynal, Ramil Babayev, İlkin Əmrahov, Müşviq Cabbar və Ələsgər Məmmədli saxlanılıb.
Saxlanılanlar Cinayət Məcəlləsinin qaçaqmalçılıq maddəsi ilə ittiham edilirlər. Onlar ittihamla razılaşmır, həbslərini peşə fəaliyyətləri ilə əlaqələndirirlər.
