Gürcüstanda parlament seçkilərinə 3 gün qalmış, 24 oktyabrda səhər saatlarında Maliyyə Nazirliyinin İstintaq Xidməti Amerika mərkəzli Atlantic Council-un Gürcüstandakı əməkdaşlarının evində axtarış aparıb.
Axtarışlarla bağlı ilkin məlumatı yeni yaranmış Federal Partiyasının qurucusu Qeorgiy Noniaşvili verib. Budəfəki seçkilərdə iştirak etməyən partiyanın qurucusu açıqlama yayıb ki, onun evində axtarış aparılaraq özünə və ailəsinə aid bütün elektron cihazlar götürülüb. Noniaşvinin həyat yoldaşı Sofo Qelava Atlantic Council-da işləyir.
Onlara bildirilib ki, İstintaq Xidməti vergidən yayınma ilə bağlı araşdırmalara başlayıb. Lakin Qelava seçkiyə cəmi 3 qalmış belə bir araşdırmanın başlanmasının şübhəli olduğunu düşünür. Qelava əlavə edib ki, onun fəaliyyəti tamamilə siyasətlə bağlıdır. O, dezinformasiyanı və Rusiyanın Gürcüstanda keçirilən parlament seçkilərinə təsirini araşdırıb.
Maliyyə Nazirliyinin İstintaq Xidməti həm də Atlantic Council-un başqa bir əməkdaşı Eto Buziaşvilinin evində axtarış aparıb. Formula TV-yə verdiyi müsahibədə Buziaşvili deyib ki, xidmətin əməkdaşları ona evdə qaz sızmasını yoxlamaq istədiklərini deyərək aldadıb və evə daxil olub. Evdə axtarış 2 saat çəkib və Buziaşviliyə vəkilinə zəng etməyə icazə verilməyib.
Ondan yalnız çalışdığı təşkilat, Atlantic Council barədə məlumatlar soruşublar.
Xidmətin əməkdaşları Sofo Qelavanın evində olduğu kimi Eto Buziaşvilinin də bütün elektron cihazlarını aparıblar.
“Mən evdən çalışıram. Kompyuter mənim işimin əsas tərkib hissədir. Mən hər gün bütün dünyadakı dezinformasiyanı araşdıraram. Məsələn, Rusiyanın dezinformasiya vasitəsi ilə Gürcüstana təsiri. Hazırda bu mövzu üzərində çalışıram. Ümid edirəm ki, yazını tamamladıqdan sonra ən qısa zamanda yayımlanacaq”.
“Civil Georgia” öz mənbələrinə istinadən yazır ki, araşdırma cinayət məcəlləsinin 3 maddəsi – Pulyuma, dələduzluq və vergidən yayınma ilə əlaqədar aparılır.
