Masallı rayonu Ərkivan qəsəbəsi sakinləri yaşadıqları ərazinin yaxınlığında tır parkı salınmasından narazıdır. Bu barədə Mikroskop Media-ya məlumat verən qəsəbə sakini Həqiqət Heydərova deyir ki, həmin ərazinin təyinatı və şəraiti tır parkı üçün uyğun deyil. Onun sözlərinə görə, 90-cı illərin əvvəllərində ilk dəfə özəlləşdirilmiş torpaq sahəsi əslində kənd təsərrüfatı təyinatlıdır.
Həmin ərazinin yaxınlğında yaşayan təxminən 10-12 ailə isə vəziyyətdən narazıdır. Onlar deyir ki, ərazi irihəcmli tırların hərəkəti, manevri üçün uyğun deyil. Eyni zamanda sıx yaşayış məskəni olan və uzun müddətdir orada yaşayan sakinlər ola biləcək səs-küydən də narazıdır.
“Uzun müddət bu ərazini müxtəlif təyinatlar üzrə – xəstəxana, ev tikmək və s. üçün istifadə etmək istəyiblər, amma yerli icra hakimiyyəti icazə verməyib. Bir müddət öncə bu ərazini satın alan başqa bir iş adamı burada tır parkı yaratmaq istəyir, indiki icra hakimiyyəti başçısı isə buna şərait yaradır”.
Narazı olan qəsəbə sakinlərinin sözlərinə görə, onlar indiyə qədər bu məsələ ilə bağlı Kənd Təsərrüftı Nazirliyinə, Prezident Administrasiyasına və İqtisadiyyat Nazirliyinə müraciət ediblər, amma şikayətləri cavabsız qalıb.
“Nazirlər Kabinetindən də maraqlandım ki, həmin torpaq sahəsinin təyinatı dəyişdirilib yoxsa, yox. Mənə bildirildi ki, hələ də o ərazi kənd təsərrüfatı təyinatlıdır, amma iş adamı buna məhəl qoymur və icra başçısı da onu müdafiə edir”.
Şikayətçilər deyir ki, hətta icra başçısı ilə görüşdə də onlar bu vəziyyətdən narazı olduqlarını bildiriblər, amma bu da nəticəsiz qalıb.
“Həmin görüşdə bizimlə yanaşı rayonun müxtəlif kəndlərindən fərqli problemlərlə gələn şikayətçilər var idi. Lakin icra başçısı onların da şikayətinə adekvat reaksiya vermirdi” – Həqiqət Heydərova deyir.
Qəsəbə sakinlərinin şikayəti ilə bağlı tır parkının salınması planlaşdırılan ərazinin sahibi Süleyman Abdullayev Mikroskop Media-a açıqlamasında deyib ki, o, həmin torpaq sahəsini kənd təsərrüfatı təyinatlı yox, sahibkar torpağı kimi alıb və sənəd ona ASAN Xidmət-dən təqdim olunub.
“Əgər torpaq kənd təsərrüfatı təyinatlı olsaydı, onun vergisi çox az olardı, amma sahibkar torpağı olduğuna görə məndən 6 min manat vergi tutulub.
Torpaq sənədini icra başçısı vermir, alqı-satqı baş tutur, Cəlilabad regional torpaq şöbəsi qeydiyyatını aparır, amma sənəd ASAN Xidmətdən verilir, gedib icra başçısından, hətta rayon torpaq şöbəsindən də ala bilmərsən”.
Həmin torpaq sahəsinin yaxınlığında yaşayan ailələr, xüsusən də Heydərov ailəsi ilə hər hansı konflikti olmadığını deyən S. Abdullayevin sözlərinə görə, tır parkının sakinlərə hər hansı maneəsi yoxdur:
“Elə bil ki, öz maşınını qaraja salırsan, mən də öz maşınlarımı həmin ərazidə saxlayacam. Yer yox idi deyə yol kənarında saxlayırdıq, onda da polis işçilərinə, yol hərəkətinə maneə törədir. Tır parkının onlara heç bir maneəsi yoxdur və çıxışı ayrıdır. Onların yoluna maneə olacaq yer yoxdur, mənim yolum birbaşa avtomobil yoluna çıxır.”
Ərkivan qəsəbə icra nümayəndəsi Elmir Əliyev Mikroskop Media-ya açıqlamasında deyib ki, həmin ərazi üçün qeyri-yaşayış obyekti kimi çıxarış verilib.
“Həmçinin çıxarışa biz müdaxilə edə bilmərik, onu Əmlak Məsələləri üzrə Dövlət Komitəsi verir. Bu çıxarışda da təyinat qeyri-yaşayış obyekti yazılıb. Bununla bağlı vətəndaşlar bir neçə dəfə müraciət edib və onlara izah olunub ki, hər hansı şikayətləri varsa, Əmlak Məsələləri üzrə Dövlət Komitəsinə və ya məhkəmə orqanlarına müraciət edə bilərlər”.
İcra nümayəndəsi hesab edir ki, tır parkı ərazidəki sakinlər üçün problem yaratmayacaq, çünki onun çıxışı ayrıdır.
“Dövlət Xidmətindən bizə zəng eləmişdilər, vətəndaşlar onlara da müraciət edib. Həmçinin də rayon prokurorluğuna. Bunla bağlı araşdırmalar aparılır”. – E. Əliyev bildirib.
