TikTok sosial şəbəkəsi əlində telefon vaxtı göstərərək “SeaBreeze”ə neçə dəqiqəyə çatacağını müəyyənləşdirən fenomenlərlə doludur. Həmin videolarda onlar Bakının müxtəlif istiqamətlərindən ya öz maşınları, ya da taksi ilə “SeaBreeze”ə gedərək yolun nə qədər qısaldığını nümayiş etdirir.
“Sea Breeze”ə məsafəni qısaldan həmin yol Böyükşor–Pirşağı avtomobil yoludur. Fenomenlər isə bu avtomobil yolundan videoları hələ rəsmi açılışı olmadan paylaşmağa başlayıb.
Rəsmi açılışını isə bir neçə gün əvvəl, 7 noyabrda şəxsən prezident İlham Əliyev edib. Uzunluğu 12,7 km olan yolda həm də “Sea Breeze”i göstərən yol nişanları da yerləşdirilib.
Təzə avtomobil yoluna kim, nə vaxt qərar verib?
Böyükşor–Pirşağı avtomobil yolunun tikintisi barədə sərəncam 2023-cü ilin 25 oktyabrında imzalanıb. İlham Əliyevin sərəncamı ilə yolun tikintisinə 4 milyon 700 min manat vəsait ayrılıb. Sərəncamda bunun ilkin məbləğ kimi Azərbaycan Avtomobil Yolları Dövlət Agentliyinə həvalə edildiyi qeyd olunur. Lakin sonradan yolun tikintisi üçün əlavə yenə maliyyə ayrılıb-ayrılmadığı barədə məlumat yoxdur.
Əliyevin keçmiş kürəkəni Emin Ağalarov özü də bu yeni avtomobil yolunun “SeaBreeze”ə nə qədər yaxın olduğunu nümayiş etdirən videolar yayımlayıb. Həmin videolardan birini bu ilin 23 oktyabrında paylaşıb. O, fəxrlə saatın 12:09 olduğunu və 23 km-lik yolun 17 km-lik hissəni sürət həddini keçmədən gedərək cəmi 10 dəqiqəyə “SeaBreeze”ə çatdığını deyir.
“SeaBreeze” bu yolu İlham Əliyevin sərəncamı imzaladığı gündən cəmi 1 ay sonra reklam etməyə başlayıb. Qeyd edilb ki, bu yol şəhərdən Sea Breeze-ə çatma müddətini 23 dəqiqəyə qədər azaldacaq.
