7 Apreldə REAL Hərəkatı qurultay keçirib. Qurultayda hərəkatın partiyaya çevrildiyi elan edilib. Bu barədə Natiq Cəfərli facebook statusunda məlumat yayıb.
O qeyd edib ki, bütün çətinliklərə baxmayaraq fərqli formatda, kreativ üsullarla qurultay keçib, partiya təsis olunub REAL-ın sədri və Məclisi seçilib.
https://www.facebook.com/natig.jafarli/posts/10214361790892306
“Bir onlayn platforma açdıq. Bütün qurultay nümayəndələrini oraya əlavə etdik. Partiyanın proqram və nizamnaməsi onlayn müzakirəyə açıldı. Çox ciddi müzakirələr aparıldı, nizamnamə və proqrama dəyişikliklər oldu. Şənbə günü (aprelin 7-də) onlayn qaydada səsvermə keçirildi, proqram və nizamnamə qəbul edildi” – deyə Natiq Cəfərli Amerikanın səsinə verdiyi müsahibəsində deyib.
REAL dəfələrlə Bakı Şəhər İcra Hakimiyyətindən qurultay keçirmək məqsədilə yer ayrılması xahişi ilə müraciətlər etsə də müsbət cavab verilməmişdi.
Dekabrın 17-də Müsavat Partiyasının qərargahında keçirilməsi gözlənilirdi. Ancaq deyilən vaxta bir neçə gün qalmış Müsavat Partiyasının rəhbərliyi bildirdi ki, Əmlak Məsələləri üzrə Dövlət Komitəsinin sədr müavini Rafiq Cəlilovun adından onlara məktub gəlib. Verilən məlumata görə, məktubda partiyaya xəbərdarlıq edilib ki, onlarla bağlanmış müqaviləyə əsasən, binanı üçüncü qurum icarə götürə bilməz.
- REAL Hərəkatı 2009-cu ildə yaradılıb. Hərəkatın lideri İlqar Məmmədov 2013-cü ildə İsmayıllı rayonunda baş verən iğtişaşların təşkilində ittiham olunaraq 7 il müddətinə azadlıqdan məhrum edilib.
- Avropa İnsan Hüquqları Məhkəməsi onun azad edilməsi barədə qərar çıxarmasına baxmayaraq o hələ də həbsdə saxlanılır.
