Bu gün Azərbaycanda növbədənkənar prezident seçkiləri keçirilir. Foto: Azərtac
Azərbaycanda bu gün növbədənkənar prezident seçkiləri keçirilir. Ölkədə 5 milyon 309 min 434 seçici qeydə alınıb və onlar 8 namizədə səs verəcəklər. Seçkiləri 894 beynəlxalq, 58 min 175 yerli müşahidəçi izləyəcək.
Bir saat əvvəl başlayan səsvermə prosesində artıq ilkin pozuntular qeydə alınıb. Jurnalist Əli Zeynal məlumat verir ki, Yasamal rayonu 17 saylı seçki dairəsinin 5, 6 və 7-ci məntəqələrində seçki qutularının üzərində olan rəqəm və dövlət gerbi telefon zəngindən sonra qoparılıb. Bununla yanaşı qutuların bəzisi şəffaf deyil.
Qutuların bəzisi şəffaf deyil. Foto: Əli Zeynal
Yasamal rayonunun 15 saylı seçki dairəsində isə saat 08:00-dan, səsvermə başlamadan əvvəl səsverənlər olub. Masaların üzərində məntəqə sədrlərinin bəzilərinin adı, soyadı qeyd olunsa da, bəzilərində heç bir qeyd yazılmayıb.
15 saylı seçki dairəsi, 5 saylı seçki məntəqəsinin sədri Ələsgərova Elmira Ələsgər qızı seçicilərə “Hamı kimə səs vermək lazımdır yaxşı bilir” – deyə bildirib.
Bir neçə gün əvvəl Mərkəzi Seçki Komissiyası seçkinin müşahidəsi üçün 1000 məntəqədə kamera quraşdırıldığını açıqlasa da məntəqələrdən bəzilərində kameralar işləmir. 15 saylı Yasamal seçki dairəsinin 25 saylı seçki məntəqəsində kamera görüntüsünü izləmək mümkün deyil.
