Paşinyanın tərəfdarları paytaxtda bütün yolları bloklayıb. Foto: Sergey Grits / AP
Ermənistanda müxalif Yelk Partiyasının sədri Nikol Paşinyan baş nazir seçilmədikdən sonra tərəfdarlarını yenidən küçələrə çağırıb. NTV Türkiyə xəbər verir ki, dünəndən etibarən başlayan aksiyalar paytaxt Yerevanı az qala iflic edib.
Belə ki, kütləvi tətilə metropoliten əməkdaşları da qoşulub və Yerevan metrosunun bütün stansiyaları bağlanıb. Bununla yanaşı Paşinyan tərəfdarları digər ictimai nəqliyyat vasitələrinin də hərəkətinə mane olub. Hava limanına gedən və şəhərin bir çox yolları bağlanıb. Hava limanına getmək istəyənlər bu yolu piyada qət etməli olublar.
Yerevanın mərkəzi küçələrindən birində etirazçıların yolu kəsmək üçün skamyadan istifadə edib. Foto: Gleb Garanich / Reuters
Fəallar həm də bəzi nazirliklərin – Elm və Təhsil Nazirliyi, Diaspora Nazirliyi binalarının girişini bağlayıb. Şəhərin bir çox küçə və prospektlərində gediş-gəliş dayanıb.
Aksiyalar təkcə paytaxtda deyil, Gümrü və Maralik şəhərlərində də geniş vüsət alıb. Maralikdə etirazçılar şəhər merinin üzv olduğu hakim partiyadan istefa verməyini və xalqa qoşulmağını tələb edir.
Ölkənin sərhədlərində də vəziyyət gərginləşib. Paşinyan tərəfdarları Ermənistanın İran və Gürcüstanla sərhəd keçid məntəqələrini bağlayıb və ölkəyə giriş-çıxış dayanıb.
Paşinyan bugünkü etirazlarda yenə meydandadır. Foto: Sergey Grits / AP
Aksiyalara qatılan və liderlik edən Nikol Paşinyan deyib ki, erkən Parlament seçkilərindən sonra baş nazir vəzifəsində hakim Respublika Partiyasının nümayəndəsi qalarsa, onlar seçkini boykot edəcəklər.
Paşinyan Reuters İnformasiya Agentliyinə açıqlamasında deyib ki, onun yeganə gücü xalqdır: “Biz təslim olmayacağıq və itaətsizliyə davam edəcəyik”.
