Milli Məclisin Dini qurumlar və ictimai birliklər komitəsinin sədri Siyavuş Novruzov Milli Məclisdə bu gün keçirilən dəyirmi masada Cinayət Məcəlləsində insan oğurluğu maddəsinə dəyişiklik təklif edib. APA-nın xəbərinə görə, deputat deyib ki, həmin məcəllədə qız qaçırılmasının insan oğurluğu kimi göstərilməsi düzgün deyil:
“Bir var tamah məqsədi ilə insan qaçırır, cinayət törədir, bir də var iki şəxs bir-birini sevir, bu səbəbdən oğlan qızı qaçırır. Bunun ikisinə də eyni cəzanın tətbiq edilməsi düzgün deyil. Biz dəyişiklik edib, bunu qanunvericilikdə fərqləndirməliyik”.
Ölkədəki QHT-lərin də fəaliyyətini tənqid edən deputat deyib ki, onların əksəriyyəti populizm və qrant əldə etməyə çalışmaqla məşğuldur:
“Hazırda ölkədə 5000 QHT fəaliyyət göstərir. İnsan haqları və sair mövzunu əldə bayraq edirlər ki, xaricin diqqətini çəksinlər, qrant əldə etsinlər. Ölkədəki daxili problemlər, məsələn psixoloji yardım və sair məsələlər isə diqqətdən kənarda qalıb. Ona görə də QHT-lərin fəaliyyəti cəmiyyətdə o qədər də hiss olunmur”.
İntiharlarla bağlı da fikrini səsləndirən Siyavuş Novruzov onların sayının artmasında mətbuatı günhlandırıb.
“Məsələn, biri intihar edir, mətbuat isə bunu işıqlandırır, dayanmadan təbliğ edir. Bunu görən digər uğur qazanmayanlar da intihara meyllənir. Əvvəllər belə hallar gizli saxlanırdı, indi isə sanki açıq təbliğ olunur. Hesab edirəm ki, bu barədə ciddi düşünməliyik”, – deyə o qeyd edib.
