Azərbaycan Xalq Cəbhəsi Partiyasının sədri Əli Kərimli bu gün Daxili İşlər Nazirliyi və Baş Prokurorluğun AXCP funksionerləri haqqında yaydığı birgə məlumata münasibət bildirib. Partiya sədri şəxsi Facebook səhifəsində adı çəkilən qurumların partiya funksionerlərini qanunsuz sahibkarlıq və çirkli pulların yuyulması kimi ittihamlarına cavab yayımlayıb.
Əli Kərimli Azərbaycan prezidenti İlham Əliyev və ailəsinin adının hallandığı korrupsiya araşdırmalarını misal çəkib və bildirib ki, keçirilən birgə əməliyyat hakimiyyətin “sən özünsən” cavabıdır.
Əli Kərimli mayın 8-i həbs olunan Saleh Rüstəmli ilə dost olduğunu və eyni əqidəni paylaşdığını bəyan edib.
“Düzdür, uzun illərdir ki, görüşmürük, ancaq biz dostuq. Saleh bəy uzun illərdir ki, Rusiyada kiçik bizneslə məşğuldur. Onun haqqında bundan sonra deyiləcəklərə inanmayın. Saleh bəyin biznesi kiçik biznesdir. Ötən bir neçə ilin ərzində mənə yardım məqsədilə bir neçə dəfə (dəqiq xatırlamıram, 5-7 dəfə ola bilər) pul göndərib. Bəzən 500 dollar, bəzən 1000 dollar olmaqla. Pul təmənnasız verildiyindən dəqiq hesabatını aparmamışam. Ancaq təqribən 5 min dollar yardımdan söhbət gedə bilər. Xəbərdə yaydıqları 412 min dollar ağ yalandır, söhbət bu məbləğin haradasa, 100-də birindən gedir. Əlbəttə, mən Saleh bəyin biznes məqsədilə kimlərə nə alıb-verdiyini bilmirəm, ancaq mənə edilən yardım, bir daha vurğulayıram ki, təqribən 5 min dollar ətrafında olub” – deyə Ə.Kərimli vurğulayıb.
https://www.facebook.com/karimliali/posts/10155529859563848
