Rusiyada həbsdə olan ukraynalı rejissor Oleq Sençov Vladimir Putinə əfv məktubu yazmayacağını deyib. Bu barədə İnterfaks rejissorun vəkili Dmitri Dinze-yə istinadən məlumat yayıb.
“Oleq əfv edilməyin əleyhinədir. O, belə bir məktub yazmaq fikrində deyil”.
Bu günlərdə Avropa Şurasının baş katibi Turbyorn Yaqland Sençovun “humanitar səbəblər”lə əfv edilməsini gündəmə gətirib. O hətta Avropa konvensiyası çərçivəsində müraciət ünvanlayacağına da hazır olduğunu açıqlayıb.
Rusiya ombudsmanı Tatyana Moskalkova da Sençovun əfv üçün müraciət etmədiyini deyib. Putinin mətbuat katibi Peskov isə açıqlamasında bildirib ki, yalnız Sençov müraciət edəcəyi təqdirdə buna baxıla bilər. Vəkil isə həbsdəki rejissorla bunu müzakirə edəcəyini deyib.
Oleq Sençov ukraynalı rejissor və aktivistdir. 2014-cü ildə Krımın ilhaqından sonra terrorizmdə təqsirləndirilərək Krımda həbs edilib. 2015-ci ilin avqustunda 20 il müddətinə azadlıqdan məhrum edilib. Həbs müddətini ciddi rejimli cəzaçəkmə müəssisəsində keçirməsi ilə bağlı qərar verilib. Sençov ittihamı rədd edir və həbsini siyasi sifariş hesab edir. Beynəlxalq insan haqları təşkilatları Sençovun azadlığını tələb edir.
Rejissor 14 may 2018-ci ildə həbs həyatını keçirdiyi “Ağ ayı” həbsxanasında aclıq aksiyasına başlayıb. O, bu aksiyanı öz azadlığı uğrunda yox, Rusiyada həbsdə yatan 64 Ukrayna vətəndaşının azadlığa çıxması tələbi ilə keçirir. Bu gün aclıq aksiyasının 40-cı gününü başa vurur.
Sençov barədə yazdığımız bu yazıdan onun barəsində daha çox şey öyrənə bilərsiniz.
