İllustrasiya: mikroskop media

1 iyul
Bakıda və Abşeron yarımadasında son 120 ilin rekord temperatur göstəricisi qeydə alındı. 43-44 dərəcə temperatur.

Əvvəlki rekord 2017-ci ilin 10 avqust tarixində qeydə alınıb. 43 dərəcə.

2 iyul
Gecə saatlarında Bakıda və Azərbaycanın əksər rayonlarında elektrik enerjisinin verilməsi dayandırıldı. Fövqəladə Hallar Nazirliyindən açıqlandı ki, Mingəçevir İES-in 6-cı blokunda yanğın baş verib. Hadisənin ilkin səbəbi həddindən artıq yüklənmə ilə izah edildi. Energetika Nazirliyinin rəsmi məlumatına əsasən, anomal isti hava şəraiti ilə əlaqədar yüklənmə 40 faiz artıb. Baş nazirin birinci müavini Yaqub Eyyubov və “Azərenerji” ASC-nin sədri Etibar Pirverdiyev Mingəçevirə getdi. İlham Əliyev vəziyyəti nəzarətinə götürdü.

3 iyul
Bakı və bəzi regionlarda işığın verilməsi bərpa edildi. Lakin kəsintilərlə.
“Bakı Metropoliteni” fəaliyyətini dayandırdı. Səbəb: elektrik enerjisinin verilişinin dayanıqlı olmaması göstərildi.

Qatarlar tuneldə qaldığından sərnişinlər vaqonlardan çıxarıldı və stansiyaya qədər yolu tunellə piyada getməli oldular.

Həmin gün axşam saatlarında isə Gəncənin icra başçısı Elmar Vəliyev və onun mühafizəçisinin güllələndi. E. Vəliyev və mühafizəçisi Qasım Aşbazov yaralandı. Əvvəlcə mühafizəçinin öldüyü sonra isə ağır yaralandığı xəbəri yayıldı. Bir neçə saat ərzində isə E. Vəliyevin də xəstəxanda öldüyü xəbərləri yazılmağa başladı.

Hər iki xəbər təsdiqini tapmadı. Baş prokurorluq, Daxili İşlər Nazirliyi və Dövlət Təhlükəsizlik Xidmətinin mətbuat xidmətlərinin birgə yaydığı məlumatda qeyd olundu ki, onların hər ikisi xəstəxanadadır. Fakt üzrə cinayət işi açıldı. Baş prokurorluğun, DİN-in və DTX-nın əməkdaşlarından ibarət istintaq-əməliyyat qrupu yaradıldı.

Həyata keçirilən tədbirlər prezidentin şəxsi nəzarətində olduğu qeyd olundu.