Azərbaycanda son iki gündə 4 müstəqil sayt bloklanıb.
Səbail rayon Məhkəməsində bu gün keçirilən iclasda isə xural.com və arqument.az saytlarının, Yasamal rayon Məhkəməsində isə monitortv.info saytının bloklanması ilə bağlı Nəqliyyat, Rabitə və Yüksək Texnologiyalar Nazirliyinin Elektron Təhlükəsizlik Xidmətinin müraciətinə baxılıb.
Sayt rəhbərləri deyir ki, nazirlik onlardan prezidentin köməkçisi Əli Həsənovla bağlı dərc etdikləri xəbərlərin silinməsini tələb edib. Onlar isə bu tələbi yerinə yetirməkdən imtina edib.
Məhkəmələrin qərarına görə adı çəkilən hər üç sayta Azərbaycanda giriş bloklanıb.
Xural.com saytının baş redaktoru Əvəz Zeynallı qərara münasibət bildirərkən deyib ki, bu, siyasi məsələdir:
“Proses tamamilə ortaya çıxarır ki, bu məsələ siyasi məsələdir. Azərbaycan mediasının ən son qalan adda-budda insanlarını belə bloklamaq, nisbətən sözünü deyə biləcək saytları bloklamaqdır”.
Avqustun 7-də Səbail Rayon məhkəməsi az24saat.org saytının bloklanması barədə qərar qəbul edib. Həmin saytda da Əli Həsənovla bağlı dərc edilən yazının silinməsi tələb olunsa da saytın rəhbəri Vüqar Qurdqanlı bundan imtina edib.
