Uşaqların zorakılığa məruz qaldığı bağçanın müdiri barəsində cinayət işi açılıb

Bakıdakı “Kids studio” uşaq bağçasının müdiri Nigar Müseyibova barəsində cinayət işi başlanıb.

“Report” yazır ki, ona qarşı Cinayət Məcəlləsinin 314.1-ci (səhlənkarlıq, yəni vəzifəli şəxsin işə vicdansız və ya laqeyd münasibəti nəticəsində öz xidməti vəzifəsini yerinə yetirməməsi və ya cəmiyyətin qanunla qorunan mənafelərinə mühüm zərər vurulmasına səbəb olduqda) maddəsi ilə ittiham irəli sürülüb.

Nə baş verib: Bu il iyunun əvvəllərində Yasamal rayonunda yerləşən “Kids Studio Uşaq Mərkəzi”nin bağçasında uşaqların tərbiyəçi Firuzə Tağıyeva tərəfindən zorakılığa məruz qalması ilə bağlı video görüntülər yayıldı. Daha sonra isə Firuzə Tağıyevanın barəsində işgəncə vermə, iki və ya daha çox şəxsə qarşı törədildikdə maddəsi ilə ittiham irəli sürüldü. 3 oktyabrda cinayət işi üzrə məhkəmə prosesi başa çatan Firuzə Tağıyeva şərti azadlığa buraxılıb.