Müsavatın Gənclər təşkilatı Əbülfəz Sadıqbəylinin həbsi ilə bağlı bəyanat yayıb

Əbülfəz Sadıqbəyli aksiyaların birində saxlanılarkən. Foto: şəxsi arxiv / facebook2

Müsavat Partiyası Gənclər təşkilatı, qurumun sədri Əbülfəz Sadıqbəylinin həbsi ilə bağlı bəyanat yayıb.

Bəyanatda qeyd edilib ki, Əbülfəz Sadıqbəyliyə qarşı irəli sürülən bütün ittihamlar əsassızdır, absurddur.

“Əbülfəz Sadıqbəylinin həbsi onun siyasi fəaliyyəti ilə bağlıdır və Azərbaycanda hakimiyyətin apardığı repressiya siyasətinin davamıdır. Müsavat Gənclər Təşkilatı Əbülfəz Sadıqbəylinin dərhal azad edilməsini, bu işdə həqiqi təqsirli olanların cinayət məsuliyyətinə cəlb olunmasını tələb edir. Müsavat Gənclər Təşkilatı demokratik düşüncəli bütün gəncləri Azərbaycanda ədalət uğrunda mübarizədə daha fəal olmağa çağırır”.

Nə baş verib: Noyabrın 21-də Səbail Rayon Məhkəməsi Əbülfəz Sadıqbəylinin barəsində 3 aylıq həbs qətimkan tədbiri seçib. Məhkəmə bunu müxalifət fəalının bir neçə il əvvəl “Nikoyl” bankdan avtomobil almaq üçün götürdüyü kreditlə əlaqələndirib.

Hansı ittihamla: Əbülfəz Sadıqbəyli CM-in 178.2.1 (qabaqcadan əlbir olan qrup tərəfindən dələduzluq) və 320-ci (saxta sənəd hazırlama və ya istifadə) maddələri ilə ittiham olunur.

Müsavat başqanı nə deyir: Arif Hacılı deyir ki, bu həbs hakimiyyətin Müsavat Partiyasına qarşı apardığı qanunazidd fəaliyyətin davamıdır və Əbülfəz Sadıqbəyli dərhal azad edilməlidir.