Evindən çıxarılan ”Sovetski” sakinləri həbs edilib

Dekabrın 24-də Yasamal Rayon Məhkəməsində Bakının “Sovetski” ərazisinin sakinlərinin məhkəməsi olub.

Hakim Hüseyn Səfərovun sədrlik etdiyi məhkəmənin qərarı ilə Namiq və Tofiq Cəfərovlara, həmçinin Bəxtiyar Rəsulova polisə müqavimət ittihamı ilə 10 günlük həbs cəzası verilib.

Meydan TV yazır ki, məhkəmə qapalı keçib və ailə üzvləri içəri buraxılmadıqlarını bildirib. Vəkilin sözlərinə görə isə müdafiə hüququ da təmin olunmayıb:

“Çıxışa icazə verilmədi. Protokolun heç bir sübutu, əsası yox idi. Şəxsləri polisin qanuni tələbinə tabe olmamaqda ittiham edib tutublar. Amma polisin nə tələb etdiyi barədə heç nə deyilmədi. Polisin tələbinin qanuni olub-olmaması araşdırılmadı. Formal olaraq, məhkəmə keçirildi və şəxslər cəzalandırıldı”.

Nə baş verib: Dekabrın 22-i axşam saatlarında keçmiş “Sovetski” ərazisində sakinlərlə icraçılar arasında insident yaşanıb. Ailə üzvlərinin sözlərinə görə, polis 17 yaşlı uşağı döyüb və onun burnu sınıb. İnsidentdən sonra ailənin 5 üzvü 26 saylı polis bölməsinə aparılıb.

• Cəfərovlar ailəsi qərardan Apelyasiya şikayəti verəcəyini deyib.