Bloqqer Mehman Hüseynovun ittiham olunduğu cinayət işi sübuta yetirilərsə, onu 3 ildən 7 ilə qədər həbs gözləyir. İttihama görə bloqqer 14 saylı cəzaçəkmə müəssisəsində inspektorun əmrinə tabe olmayıb, ona müqavimət göstərərək yaralayıb. Həmçinin qadağan olunduğu halda onun üzərindən 461 manat pul tapılıb.
Qanunvericiliyə görə, pul cəzaçəkmə müəssisələrində saxlanması qadağan olunan əşyalar sırasındadır. Lakin eyni müəssisədə cəza çəkən, keçmiş siyasi məhbus Rəsul Mürsəlov deyir ki, 14 saylı CÇM başda olmaqla Azərbaycan həbsxanalarında hər hansı bir məhbusun pulsuz yaşamağı qeyri-mümkündür:
“Cəzaların İcrası Məcəlləsinə görə məhkumların pul saxlaması qadağandır, amma Azərbaycan reallığında həbsxanalarda pulsuz yaşamaq mümkünsüzdür. Əgər söhbət sırf 14 saylı cəzaçəkmə müəssisəsindən gedirsə, orada cəza çəkmiş biri kimi deyə bilərəm ki, hamamdan tutmuş paltar yuma otağına, hətta suya qədər hər şey pulla verilir. Bunu da həbsxanada öz biznesini quran və həmin həbsxananın rəisi Əli İbrahimov edir. Bütün bunların müqabilində məhkumun üstündən pulun aşkarlanması iddiası olduqca gülüncdür, çünki məhkumun pulu olmasa adi sanitar-gigyenik qaydalara, duş qəbul etməyə belə əməl edə bilməz”.
Əgər bu cinayət işi açılmasaydı Mehman Hüseynov iki aydan sonra azadlığa çıxacaqdı.
Vəkili nə deyir: Mehman Hüseynovun vəkili Şəhla Hümbətova Meydan TV-yə deyib ki, bloqqer dünən atası ilə görüşüb və ona hər şeyin normal olduğunu deyib. Vəkil yeni cinayət işinin açılacağı barədə ehtimalların özünü doğrultduğunu vurğulayıb.
“Hakimiyyət onu buraxmaq istəmir deyə bu gün belə bir cinayət işini açdılar. Sabah onunla görüşməyə gedəcəm, güman ki, bloqqeri Kürdəxanıya aparacaqlar. Əgər görüş baş tutsa, məsələni təfərrüfatı ilə öyrənəcəm”.
Oxşar təcrübə başqa kimdə olub: Sentyabrın 29-u həbs müddətinin bitməyinə 1 gün qalmış AXCP sədrinin müşaviri Məmməd İbrahimə yeni cinayət işi açılıb. O, Cinayət Məcəlləsinin 317.2.1(CÇM-də qeyri qanuni əşyaların daşınması) maddəsi ilə ittiham olunub. Bundan öncə isə partiya fəalı 2015-ci il sentyabrın 30-da AXCP-nin keçmiş üzvü Mikayıl Quliyevin şikayəti əsasında həbs olunub. Sonradan onun ittiham olunduğu maddə 221.2.2-ci maddəsi ilə (silah tətbiq etməklə xuliqanlıq törətmək) əvəzlənib. Nərimanov rayon məhkəməsinin hökmü ilə 3 il azadlıqdan məhrum edilib.
Nə baş verib:
M.Hüseynov 2017-ci il martın 3-də Suraxanı Rayon Məhkəməsinin hökmü ilə 2 il azadlıqdan məhrum edilib. O, polisə böhtan atmaqda ittiham olunub.
Penitensiar xidmətin bu gün yaydığı məlumata görə, Mehman Hüseynov cəza çəkdiyi 14 saylı cəzaçəkmə müəssisəsində ümumi axtarış zamanı Rejim-nəzarət şöbəsinin böyük inspektoru, ədliyyə leytenantı Əli Abdalova xəsarət yetirib. Fiziki müqavimət göstərdiyi iddia olunan bloqqerin otaqda olan əşyaları sındırdığı deyilir. Cinayət Məcəlləsinin 315.2-ci maddəsi (hakimiyyət nümayəndəsinə xidməti vəzifələrini yerinə yetirərkən həyat və sağlamlıq üçün təhlükəli olan zor tətbiq etməklə müqavimət göstərmə) ilə cinayət işi başlanıb.
Mehman Hüseynov kimdir: Bloqqer Mehman Hüseynov deputatlar və yüksək vəzifəli şəxslərə məxsus olduğu deyilən mülklər, villalar barədə video-sujetlər hazırlayıb.
M.Hüseynov həbsinin siyasi motivli olduğunu düşünür.
Beynəlxalq hüquq müdafiə təşkilatları onu vicdan məhbusu elan edib.
