Müsavat Partiyasının fəalı Azad Həsənovun ev dustaqlığına buraxılması ilə bağlı verdiyi vəsatəti Xətai Rayon Məhkəməsi rədd edib.
Vəkil Osman Kazımov Meydan TV-yə deyib ki, istintaqdan yayınmaq və şahidlərə təsir göstərmək ehtimalı ilə fəalı ev dustaqlığına buraxmayıblar.
Nə baş verib: Azad Həsənov bu il oktyabrın 10-da mühacir kimi yaşadığı Vilnusdan (Litva) Bakıya gəlib. Xəstə olan atasını görməyə gələn Müsavat Partiyası fəalı mülki geyimli şəxslər tərəfindən saxlanılıb. Ona Cinayət Məcəlləsinin 234.4.3 (satış məqsədilə külli miqdarda narkotik, psixotrop maddə əldə etmə, daşıma, saxlama) maddəsilə ittiham irəli sürülüb. Xətai Rayon Məhkəməsinin qərarıyla onun barəsində 4 ay müddətinə həbs-qətimkan tədbiri seçilib. İttiham sübut olunarsa, o, 5 ildən 12 ilə qədər azadlıqdan məhrum edilə bilər.
Müsavat Partiyası fəalın saxlanmasını hakimiyyətin qisasçılıq və repressiya siyasətinin davamı kimi qiymətləndirib. A.Həsənov da siyasi baxışlarına, sosial şəbəkələrdəki tənqidlərinə görə cəzalandırıldığını düşünür.
