Vəkil Osman Kazımov 1 saylı Bakı İstintaq Təcridxanasında Müsavat Partiyasının fəalı Azad Həsənovla görüşüb.
Vəkil bastainfoya deyib ki, Azad Həsənovun həbsindən ayyarım vaxt keçsə də, cinayət işi ilə əlaqədar hər hansı istintaq hərəkəti aparılımır.
“Azad Həsənovun telefonla danışmasına qadağa qoyulub. Bununla bağlı müvafiq qurumlara müraciət etsəm də, bu qadağalar aradan qaldırılmayıb”.
Vəkil Azad Həsənovun sağlıq durumunun normal olduğunu deyib.
Nə baş verib: Azad Həsənov oktyabrın 11-də mühacirətdə olduğu Litvadan ağır vəziyyətdə olan atasını görmək üçün Bakıya qayıdıb. Bir müddət sonra isə həbs edilib.
Hansı ittihamla təqsirləndirilir: Ona qarşı Cinayət Məcəlləsinin 234.4.3 maddəsi ilə (qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, saxlama, daşıma, göndərmə və ya satma – qabaqcadan əlbir olan bir qrup şəxs tərəfindən və ya mütəşəkkil dəstə tərəfindən külli miqarda törədildikdə) ittiham elan edilib.
Onun barəsində Xətai rayon Məhkəməsi tərəfindən 4 ay həbs qətimkan tədbiri seçib.
Müsavat Partiyası Azad Həsənova qarşı ittihamın uydurma olduğunu bəyan edib.
Azad Həsənov 2003-cü ildən Müsavat Partiyasının fəal üzvüdür. O, 2014-cü ilin fevralından ailəsi ilə birgə mühacirətdədir, 2016-cı ilin yanvar ayından Litvada siyasi sığınacaq alıb.
