ABŞ-ın “Washington Post” qəzetinin redaksiya heyəti həbsdə aclıq aksiyası keçirən bloqqer Mehman Hüseynov haqqında yazı yazıb. Redaksiya bloqqerin ittiham olunduğu cinayət işlərinin siyasi motivli olduğunu yazır və Mehman Hüseynovun azad olunmasını tələb edir.
Bloqqerin 2 il öncə ittiham olunduğu cinayət işi və həbsinə qədərki fəaliyyətindən yazan redaksiya heyəti həm də ölkədə 100-dən çox siyasi məhbusun olduğunu xatırladır. Yazıda o da qeyd olunur ki, siyasi motivlə həbs olunanlardan 10 nəfəri jurnalist və bloqqerdir.
Qəzet ABŞ-ın Azərbaycana yeni təyin olunan səfiri Örl Litsenbergerdən də bu məsələni diqqətdə saxlamağı tələb edir:
Senatın Beynəlxalq Əlaqələr Komitəsində təcrübəli kariyerası olan Örl Litsenberger yenicə ABŞ səfiri təyin olunub. O, səfir kimi təsdiqlənməsində elan edib ki, demokratiya yalnız azad məhkəmə, qanunun aliliyinə hörmət, azad media, sivil cəmiyyət, pluralism, demokratik seçki prosesi və insan hüquqlarına və təməl azadlıqlara hörmət şəraitində inkişaf edir. Öz yeni vəzifəsində ilk iş kimi səfir bu siyahını Cənab Əliyevə yüksək səslə oxumalıdır və Cənab Hüseynovun azad olunmasını tələb etməlidir.
Nə baş verib: Video-bloqqer Mehman Hüseynov həbs müddətinin bitməyinə iki ay qalmış yeni cinayət işində ittiham olunub. O, həbsxana əməkdaşına xəsarət yetirməkdə təqsirli bilinir. Bu ittihamla onu 5-7 il həbs gözləyir.
