Beynəlxalq təşkilatların siyasi məhbus kimi tanıdığı Qiyas İbrahimovun anası Şura Əmiraslanova həbsdə oğluna qarşı təzyiqlərin olduğunu deyir. O, Mikroskop-a açıqlamasında bildirib ki, Q. İbrahimovla bu gün baş tutan görüşləri zamanı məlum olub ki, cəzaçəkmə müəssisəsində ona telefon danışmağa icazə verilmir. Bu təzyiqlər isə Qiyasın Mehman Hüseynov və digər siyasi məhbuslara dəstək üçün keçirdiyi aclıq aksiyasından sonra başlayıb:
Telefonla danışmağına icazə verilmir, Həsən adlı bir nəfər onu təxribata çəkir. Hərtərəfli nəzarətə götürüblər, heç nəyə imkan vermirlər. Qiyas həmişə onların gözü önünüdə yazırdı, heç nə etmirdilər. Bu gün icazə vermədilər ki, o, yazdığı məktubu mənə versin, əlimdən aldılar. Mən də buna etiraz etdim. Rəisin müavini ilə görüşüm oldu, mənə dedi ki, indiyəcən sizə hörmət edirdik. Mən də dedim ki, heç bir hörmətiniz lazım deyil, biz haqqımızı istəyirik.
Buna da bax: Aclıq aksiyasına başlayan siyasi məhbusların məktubunun tam mətni
Ş.Əmiraslanova deyir ki, Qiyas İbrahimov aclıq aksiyasını davam etdirdiyi ərəfədə iki dəfə evlə əlaqə saxlamaq istəsə də ona icazə verilməyib və deyilib ki, telefon xarabdır:
Qiyas da etiraz edib ki, o gələndə başqaları danışırdı, necə olub ki, növbə ona çatanda telefon işləməyib. Əvəzində təhqir olunub, cavab qaytarandan sonra da həmin şəxs Qiyasın ütsünə atılıb onu vurmaq istəyib. Qiyas deyir ki, onu təxribata çəkməyə çalışıblar, istəyiblər ki, aclıq aksiyasını zorla dayandırsın.
Nə baş verib: Qiyas İbrahimov 2016-cı il oktyarın 25-də 10 il müddətinə azadlıqdan məhrum edilib. O, külli miqdarda narkotik maddənin dövriyyəsində təqsirli bilinir. Qiyas İbrahimov Bayram Məmmədovla birlikdə həmin il mayın 10-da Heydər Əliyevin heykəlinə “qul bayramınız mübarək” sözləri yazdıqdan sonra saxlanıblar. Fəallar və beynəlxalq təşkilatlar onların məhz heykəldəki yazıya görə həbs olunduğunu deyir.
