“Gucci”nin 890 dollarlıq koftası irqçilik iddialarına görə satışdan yığışdırılıb

Brendin satışdan yığışdırmaq məcburiyyətində qaldığı sviter. Foto: “Gucci”

İtaliyanın məşhur moda evi “Gucci” üzün yarısını örtən və iri qırmızı dodaq təsviri ilə diqqət çəkən sviterin (“balaclava” model koftanı) satışdan yığışdırmalı olub.

Buna səbəb isə sosial media istifadəçilərinin həmin geyimi “Qara tarix ayı” (ABŞ-da hər ilin fevral ayı afrika mənşəli amerikalıların fəaliyyətlərini və keçmişini işıqlandırmaq məqsədilə “Black history month” olaraq qeyd olunur) ilə əlaqələndirmələri olub.

Bildirilir ki, 890 dollarlıq həmin kofta 2018-ci ilin payız-qış kolleksiyasında satışa çıxarılıb.

Yəni, əslində geyim “Twitter” və “Instagram” istifadəçilərinin diqqətini bir az gec cəlb edib. Sosial şəbəkə istifadəçiləri həmin geyimin fotolarını çərşənbə günü paylaşmağa başlayıblar. Onlar hazırda ABŞ-da “Qara tarix ayı” olduğunu xüsusi vurğulayıblar.

Həmin günün axşamı isə moda evi üzr istəyib və koftanın satışdan yığışdırılacağını, rəsmi internet səhifəsindən fotolarının silinəcəyini açıqlayıb.

  • Əslində “Gucci” irqçilikdə ittiham olunan və buna görə geri addım atmalı olan ilk moda evi deyil. Məsələn, ötən ilin dekabrında “Prada” özünün “Pradamalia” seriyasından olan iri qırmızı dodaqlı qara meymun formasındakı açarlığı satışdan yığışdırıb.

  • Ondan öncə, noyabrda da oxşar hadisə baş verib. Belə ki, “Dolce & Gabbana”nın reklam çarxındakı çubuqlarla pizza və spagetti yeyən çinli model müsbət qarşılanmayıb. Nəticədə brendin Şanxaydakı moda nümayişlərindən biri ləğv edilib. Bir neçə Çin şirkəti isə brendlə əməkdaşlığı dayandırıb.

Şərhini yaz

Şərhinizi yazın
Adınızı daxil edin