Ömər əl-Bəşir. Foto: Reuters /Mohamed Nureldin Abdallah

Sudanda ordu səhər saatlarında dövlət televiziyasının binasını mühasirəyə alıb, bir qrup hərbçi binaya daxil olub.

NTV yazır ki, onlar ölkə üçün mühüm məlumatlar paylaşacaqlarını bəyan ediblər.

Daha sonra hərbçilər Prezident Ömər əl-Bəşirin vəzifədən uzaqlaşdırıldığını, səlahiyyətlərinin əlindən alındığını və hökumətin buraxıldığını elan edib. Prezident iqamətgahı hərbçilər və zirehli texnika ilə mühasirəyə alınıb.

Məlumata görə, Ömər əl-Bəşirin ətrafında olan indiki və keçmiş yüksək vəzifəli şəxslər həbs ediliblər. Həbs edilənlər arasında Prezident Qvardiyasının rəhbəri, keçmiş müdafiə naziri Əbdül Rahim Məhəmməd Hüseyn, hakim Milli Konqres Partiyasının sədri Əhməd Harun, keçmiş vitse-prezident Əli Osman Taha da var.

Ömər əl-Bəşir isə ev dustaqlığında saxlanılır, onun mühafizəçisi həbs olunub.

Hazırda ölkənin paytaxtı Xartumda beynəlxalq hava limanı bağlanıb. Paytaxt küçələrinə axışan minlərlə insan Ömər əl-Bəşir rejiminin sona çatmasını bayram edir.

Nə baş verib: Hərbçilər Sudanda bir müddətdir hakimiyyəti ələ keçirməyə çalışırdılar. 2018-ci ilin dekabrından Sudanda Prezident Ömər Həsən Əhməd əl-Bəşirin istefası tələbi ilə etiraz aksiyaları keçirilirdi. Aksiyalarda xüsusilə qadınlar aktivlik göstərirdilər. Son günlərdə baş tutan etirazlarda 11 nəfər həlak olub, minlərlə insan həbs olunub.

Ömər əl-Bəşir 1989-cü ilin iyunundan bəri Sudana rəhbərlik edir. O, ancaq seçki yolu ilə hakimiyyətdən gedə biləcəyini bəyan etmişdi.