Amerika Birləşmiş Ştatlarının (ABŞ) mühafizəkar ştatları ard-arda abortu qadağan edən qanunlar qəbul edir.
Sputnik yazır ki, Missuri ştatı isə abort xidməti təqdim edən bütün klinikaları bağlamaq istəyir. Abort olunmaq istəyən qadınlara, hamilələrə və yeni ana olanlarla körpələrinə tibbi dəstək verən “Planned Parenthood” federasiyasının bu ştatdakı klinikasının lisenziyası yenilənməyib. Ştatda abort xidməti göstərən sonuncu klinika – “Planned Parenthood” Missurini məhkəməyə verib. Məhkəmə onların lehinə qərar verməsə, klinika bağlanacaq.
Federasiyasının rəhbəri Dr. Lena Uen xalqın səhiyyə böhranı ilə üzləşəcəyini deyib:
Missuri ölkədə qaranlığa təslim olan ilk ştat ola bilər. Burada etibarlı, qanuni abort xidməti verən səhiyyə mərkəzi olmayacaq. Donald Tramp hakimiyyətinin və respublikaçıların görmək istədiyi dünya budur – abortun qadağan və əlçatmaz olduğu bir ölkə…
Nə baş verib: 2 həftə əvvəl Missuridə respublikaçıların çoxluq təşkil etdiyi Senat hamiləliyin 8-ci həftəsindən sonra abortu qadağan edib. Qəbul edilən qanuna görə, abort ancaq tibbi məcburiyyət yaranarsa, edilə bilər. Təcavüz və ensest halları isə istisna təşkil etmir. Qanuna zidd hərəkət edən həkimləri isə 15 ilə qədər həbs cəzası gözləyir. Alabama və Georgia ştatlarında da oxşar qanunlar qəbul edilib.
