2017-ci ildə dövlətə xəyanətdə ittiham olunaraq işgəncələr nəticəsində ölən hərbçilərin ailələri Müdafiə Nazirliyini məhkəməyə verir.
Turan yazır ki, ailələr bu qərarı mərhum zabit Səxavət Binnətovun xanımı nazirliyi məhkəməyə verib 200 min manat kompensasiya tələb etdikdən sonra veriblər.
Mərhum zabit Elşən Mirzəyevin xanımı Günay İbrahimova ərinin ölümündə Müdafiə Nazirliyini günahlandırır:
Onu dövlətə xəyanətdə ittiham ediblər və ölənə qədər işgəncə veriblər. Bundan sonra məhkəmə qərar çıxarıb ki, ittiham təsdiqlənməyib. Buna görə kim cavab verəcək? Mənim maddi durumum çətinləşib. Evimiz yoxdur, ailə başçısını itirmişik, azyaşlı övladım var. Uşaq keçirdiyi stressdən ürək xəstəliyi tapıb, dərman sayəsində yaşamağa məcburdur
Digər zabit Sahib Qafarovun xanımı Natəvan Qafarova da kompensasiya və ona mənzil verilməsini tələb edir.
Nə baş verib: 2017-ci il mayın 7-də Azərbaycan Baş Prokurorluğu, Dövlət Təhlükəsizliyi Xidməti, DİN və Müdafiə Nazirliyi birgə bəyanat yayaraq Tərtər rayonunda erməni kəşfiyyatı ilə əməkdaşlıq edən bir qrup hərbçi və mülki şəxsin ifşa olunduğunu bildirib. İstintaq zamanı onlarla şəxs həbs edilib və qeyri-rəsmi məlumatlara görə, bu zaman 8 nəfərə işgəncə verilib. Sonradan onlardan 4-ü günahsız olduğuna görə məhkəmə tərəfindən bəraət alıb.
