20 iyun Ümumdünya Qaçqınlar Günü ilə əlaqədar dünyadakı qaçqınların sayı açıqlanıb.
Birləşmiş Millətlər Təşkilatının Qaçqınlar üzrə Ali Komissarlığının (BMT QAK) “Qlobal tendensiyalar” hesabatına görə ötən il zorla didərgin salınmış insanların sayı son 70 ilin ən yüksək həddinə çatıb.
Hesabatda bildirilir ki, 2018-ci ildə dünyada qaçqın vəziyyətinə düşən və sığınacaq axtaranların sayı 2.3 milyon nəfər artaraq 70.8 milyona çatıb. Bu rəqəmin təqribən yarısını uşaqlar təşkil edir. Qaçqın uşaqlardan 111 mini valideynlərindən ayrı düşüb və tək başına həyatda qalmağa çalışır.
Hesabatda bu ilki rəqəmin 20 il əvvəlki ilə müqayisədə 2 dəfə çox olduğu qeyd olunur və real rəqəmlərin daha çox ola biləcəyi də istisna edilmir.
Hazırda dünyada hər gün 37 min nəfər yaşadığı yeri tərk etmək məcburiyyətində qalır.
70.8 milyona kimlər daxildir?
Birinci qrup: Müharibə və münaqişələrə görə ölkəsini tərk edənlər. Onların sayı 2018-ci ildə 500 min artaraq 25.9 milyona çatıb.
İkinci qrup: Sığınacaq üçün müraciət etdikləri ölkədən cavab gözləyən 3.5 milyon immiqrant
Üçüncü qrup: Öz ölkələrindən kənara çıxa bilməyən, ölkə daxilində başqa bir əraziyə köç edən 41.3 milyon nəfər.
Dünyanın ən çox qaçqın çıxan ölkələri:
- Suriya
- Əqanıstan
- Cənubi Sudan
- Myanma
- Somali
Yaşadıqları yeri tərk etməli olan milyonlarla qaçqının yükü əsasən varlı qərb ölkələrinin deyil, daha yoxsul və inkişaf etməkdə olan ölkələrin üzərindədir. Varlı ölkələrdə hər 1000 nəfərə 2.7 qaçqın düşdüyü halda daha kasıb ölkələrdə bu rəqəm 5.8-dir. Ən kasıb ölkələr dünyadakı bütün qaçqınların üçdə birinə ev sahibliyi edir.
