İran XİN-in mətbuat katibi Seyid Abbas Musəvi . Foto: AFP

İran ABŞ-ın tətbiq etdiyi yeni sanksiyaların Vaşinqton ilə diplomatik əlaqələrin dayandırılması mənasına gəldiyini bəyan edib.

Reuters yazır ki, bu barədə İran XİN-in mətbuat katibi Seyid Abbas Musəvi “Twitter” hesabında yazıb:

İranın dini liderlərinə və digər səlahiyyətli şəxslərə sanksiyaların tətbiq edilməsi Trampın çarəsiz hökuməti ilə diplomatik kanalın daimi bağlanması deməkdir. Tramp hakimiyyəti qlobal sülh və təhlükəsizliyi təmin etmək məqsədilə qurulan bütün beynəlxalq mexanizmləri məhv edir

ABŞ Prezidentinin milli təhlükəsizlik məsələləri üzrə müşaviri Con Bolton isə Vaşinqtonun müzakirələrə açıq olduğunu deyib:

İranın eləməli olduğu tək iş həmin açıq qapıdan keçmək və ABŞ ilə nüvə proqramı barədə danışıqlar aparmaqdır

Nə baş verib: D.Tramp dünən İranın ali lideri Ayətullah Əli Xameneyiyə və ölkənin digər yüksək səlahiyyətli şəxslərinə qarşı sərt sanksiyalar tətbiq etməklə bağlı müvafiq fərman imzalayıb. İranın xarici işlər naziri Məhəmməd Cavad Zərifə qoyulan sanksiyalar bu həftədən sonra qüvvəyə minəcək. Tramp öncə sanksiyaların İranın ABŞ-a məxsus pilotsuz uçuş aparatını vurması və Oman körfəzində iki tankerə edilən hücumlara cavab olduğunu desə də, daha sonradan sanksiyaların bu hadisələrlə əlaqəsi olmadığını deyib. Tramp daha öncə də İrana hücum təşkil etdiklərini, ancaq çoxlu sayda insanın öləcəyini nəzərə alaraq son anda bu fikirdən daşındıqlarını açıqlayıb.