Bakı Ağır Cinayətlər Məhkəməsi önündə polis maşınları. Foto: Turan

Bakı Şəhər Baş Polis İdarəsinin Cinayət Axtarış İdarəsinin rəisi, polkovnik Əlaslan Ağayevin oğlu bu gün yaşadığı evin pəncərəsindən yıxılıb ölüb. Onun intihar etdiyi, yoxsa ehtiyatsızlıqdan yıxıldığı dəqiq məlum deyil.

Əlaslan Ağayev 2011-ci ildə polis günündə “İgidliyə görə” medalı ilə təltif olunub.

2018-ci ildə keşmiş daxili işlər naziri Ramil Usubov ona “Azərbaycan Polisinin 100 illiyi” yubiley medalı verib.

Daxili İşlər Nazirliyinin rəsmi saytında “Vətəndaşlar etiraf edir” bölməsində rəisin adı var və onun vətəndaşlara problemlərin arada qaldırılmasında kömək etdiyi qeyd olunur.

Eyni zamanda mətbuatda onun adı hallanan şikayət və narazılıqlar da var. 2015-ci il oktyabrın 1-i axar.az saytında dərc olunan məqalədə iddia olunur ki, Əlaslan Ağayevin oğlu AMEA-nın elmi işçisini döyüb. elmi işçisi, filologiya üzrə fəlsəfə doktoru Əpoş Vəliyev bu hadisə ilə bağlı 102 xidmətinə şikayət etmək istəsə də Əlaslan Ağayevin onu təhdid etdiyini iddia edib.

Əlaslan Ağayev şikayət edəcəyim təqdirdə evimə narkotika atdıraraq məni gecə ilə evdən götürüb başıma oyun açaraq, yox etdirəcəyi ilə hədələdi – Ə.Vəliyev deyib.

Onun iddiası ilə bağlı Bakı Şəhər Baş Polis İdarəsinin mətbuat xidmətinin rəhbəri Qalib Arif açıqlama verib və deyib ki, yazılanlar həqiqətə uyğun deyil.

Əlaslan müəllim DİN orqanlarında yetərincə tanınmış, intellektual, öz işinin peşəkarı və yüksək intizama malik bir zabitdir. Bundan başqa, onu tanıyanlar Əlaslan müəllimin yüksək insani keyfiyyətlərə sahib ailə başçısı olduğunu yaxşı bilir. Buna görə də baş vermiş hadisənin kifayət qədər şişirdildiyi qənaətindəyəm – açıqlamada deyilir.

Əlaslan Ağayevin adı həm də saxlanılan şəxsə təzyiq göstərməkdə hallanır. Keçmiş siyasi məhbus Qiyas İbrahim 2016-cı ilin mayında, Heydər Əliyevin heykəlini yazdıqdan sonra həbs olunan zaman onun xoşagəlməz rəftarı ilə üzləşdiyini deyir:

Məni Baş Polis İdarəsinə aparanda onun qarşısına çıxardılar, dedi mənim qabağımda diz çökürlər. İşgəncə, döymək əmrlərini o verirdi, sorğu edirdi. Ayağından corabını çıxardıb göstərirdi ki, mənim “kantuziya”mdır müharibədə, sənin qohumlarınsa çətin ki, döyüşüb. Sən və sənin kimilər vətən xainisiz. Sonra Nərimanov polis idarəsinə aparılanda ora gəlmişdi yenə. Dedi ki, siqaret çəkmirsən? Nolar, orda çəkərsən. Çiyinlərinə “vosmi” də vurdurarsan. Gedirsən 10 il..

Q.İbrahim 2019-cu ilin martında İlham Əliyevin imzaladığı əfv sərəcanmı ilə azadlığa buraxılandan sonra da polisə çağrılıb. Bakı şəhər Baş Polis İdarəsinin rəisi, polis general-mayoru Mirqafar Seyidovdan əvvəl o, Əlaslan Ağayevin qəbuluna aparılıb.

Onun qarşısına çıxardılar. Dedi otur, mən də təklif etdim ki, bəlkə diz çöküm?

Bundan sonra əsəbləşdi və mənə qışqırmağa başladı, sonra da xəbərdarlıq elədi:

Bir dəfə yatıb çıxdın, indi birdəfəlik bataqlığa batmağı özün seç, mənim sənə son deyəcəyim budur, bir də prezidentimə qarşı nə isə yazsan, gələn dəfə sənlə söhbəti burada mənim yanımda həll etməyəcəklər.