Nazirlər Kabineti “Salaam Cinema Baku”nun yerləşdiyi və “Malakanların evi” kimi tanınan binanı memarlıq abidələri siyahısına daxil edib. Report yazır ki, Baş Nazir Novruz Məmmədov bununla bağlı qərar imzalayıb.
Qərarla “Yerli əhəmiyyətli daşınmaz tarix və mədəniyyət abidələrinin siyahısı”nın “Memarlıq abidələri” bölməsinə aşağıdakı ünvanlarda yerləşən binalar da daxil edilib:
İbadət evi, S.Rüstəm küçəsi, 10, 1913-cü il;
Məscid, R.Rza küçəsi (34) ilə H.Aslanov küçəsinin (85) kəsişməsi.
Nə baş verib: Süleyman Rüstəm küçəsi, 10 ünvanında yerləşən binada fəaliyyət göstərən “Salaam Cinema Baku” kinoteatrını təsis edən gənclər həmin tarixi binanı sökülmək təhlükəsindən xilas etmək istəyib. “Malakanların evi” kimi tanınan bina özəl mülkiyyət olduğundan mülk sahibi ilə təsisçi gənclər arasında bu ilin mayında narazılıq yaşanıb. Onların binadan çıxmağı tələb olunsa da gənclər bundan imtina edib və binaya status verilməsini tələb edib. Onlar daha sonra məsələ ilə bağlı birinci vitse-prezident Mehriban Əliyevaya da müraciət ünvanlayıb.
