Norveçin “Fritt Ord” təşkilatı 2019-cu il “Azad media” mükafatının qaliblərini açıqlayıb. Azərbaycandan bu mükafata araşdırmaçı jurnalist Hafiz Babalı layiq görülüb.
Mükafat H.Babalıya gəlir və korrupsiya məqsədilə törədilən cinayətlər barədə yazıları, Azərbaycan və beynəlxalq ictimaiyyətə siyasi elitada korrupsiyanın mövcud olduğunu göstərən araşdırmalarına görə verilib.
Rusiya, Ukrayna və Ermənistandan olan mediaların layiq görüldüyü mükafat qaliblərə noyabrda Litvanın Vilnüs şəhərində təqdim olunacaq. Mükafatın ölçüsü 15 min avrodur.
İndiyə qədər Azərbaycandan bu mükafata Rauf Mirqədirov, Natiq Cavadlı, Şahvələd Çobanoğlu, Zamin Hacı, Xədicə İsmayıl, Mehman Hüseynov, Seymur Həzi layiq görülüb.
Hafiz Babalı kimdir: Araşdırmaçı jurnalist Hafiz Babalı Turan, Azadlıq Radiosu və Meydan TV kii azad və müstəqil medialarla əməkdaşlıq edib. “Gips ixracı: Vergidən yayındırılan milyonlar”, “Beynəlxalq Bankın 500 milyonundan xəbər yoxdur”, “Paşayevlərin gəlirli Retro biznesi”, “’Pasha Holding’ yatırım şirkəti yaradıb” və başqa araşdırmaların müəllifidir.
