Bakı Şəhər Baş Polis İdarəsi (BŞBPİ) AXCP sədri Əli Kərimlinin 19 oktyabr mitinqində saxlanılması barədə məlumat yayıb. Report yazır ki, onun necə xəsarət alması barədə də məlumat verilib:
O, barəsində müvafiq sənədləşmə aparılması üçün avtobusa əyləşdirilərkən polis əməkdaşlarına müqavimət göstərib və nəticədə alın nahiyəsi avtomobilin dəmir barmaqlığına dəyərək yüngül xəsarət alıb. Əli Kərimli Daxili İşlər Nazirliyinin Hospitalına aparılıb, orada ona tibbi yardım göstərilib və izahatı alındıqdan sonra buraxılıb.
DİN-in Arif Heydərov adına Respublika Hospitalının rəisi İsbi Babaxanov bildirib ki, Əli Kərimli hospitalda bütün müayinələrdən keçdikdən sonra evə buraxılıb. İ.Babaxanovun sözlərinə görə, müayinədən sonra partiya sədrində heç bir problem aşkarlanmayıb və bu barədə onun özü də məlumatlandırılıb.
https://www.facebook.com/MikroskopMedia/videos/1747545082042194/
Nə baş verib: Milli Şura və AXCP-nin ötən gün “28 may” metrostansiyasının qarşısında keçirmək istədiyi mitinqə polis müdaxilə edib. Onlarla insan saxlanılıb və onlara işgəncə verildiyi barədə məlumatlar yayılıb. Saxlanılanlar arasında onlarla AXCP fəalı. o cümlədən partiyanın sədr müavini Məmməd İbrahim, Milli Şura üzvü Tofiq Yaqublu da var. Tofiq Yaqublu 15 sutka inzibati həbs cəzası alıb. Bir neçə AXCP üzvünün isə 60 sutka inzibati həbs edildiyi bildirilir.
