İran İslam İnqilabı Keçikçiləri Korpusunun elit Qüds Qüvvələrinin başçısı İranın regional təhlükəsizlik aparatının qurucusu general Qasım Süleymani cümə günü İraqın paytaxtı Bağdadda ABŞ hava qüvvələrinin bombalaması nəticəsində qətlə yetirilib.
ABŞ qətli nə ilə əsaslandırır?
Ağ Ev və Pentaqon bu əməliyyatı təsdiqlədikləri açıqlamalarda deyirlər ki, məqsəd müdafiədir. “Guardian”ın xəbərinə görə, Qasım Süleymaninin ABŞ diplomatlarına qarşı əməliyyatlar təşkil etdiyi və gələcəkdə belə hücumların qarşısını almaq üçün öldürüldüyü bildirilib. Hər iki açıqlamada əməliyyattın prezident Donald Trampın göstərişi ilə həyata keçirildiyi yazılıb.
İrandakı etiraz aksiyaları ilə bağlı nələri bilir, nələri bilmirik?
Qətlə reaksiyalar
Generalın qətlə yetirilməsinə görə İranda 3 günlük matəm elan olunub və İranın ali dini lideri Ayətullah Əli Xameneyi onu şəhid adlandırıb. Dini lider deyib ki, generalı qətlə yetirənləri sərt intiqam gözləyir.
Ölkə prezidenti Həsən Ruhani də Qasim Süleymani qətlinin qisasının alınacağını bəyan edib. Xarici İşlər naziri Cavad Zərif isə hesab edir ki, bu, beynəlxalq terrorizm aktıdır.
Süleymaninin qətli nə deməkdir?
Ağ Evin keçmiş Milli Təhlükəsizlik rəsmisi Hillari Man Leveret hesab edir ki, Süleymanini öldürmək ABŞ Müdafiə nazirinin və ya ABŞ Mərkəzi Qüvvələrinin Komandanının qətlinə bərabərdir.
General Qasim Süleymani qətli hətta neftin qiymətinə də təsir edib və o bahalaşıb. “Brent” markalı neft fyuçerslərin qiyməti 2,76% yüksələrək 60,42 dollar/barelə çatıb. Dünya bazarında WTI (West Texas Intermediate) markalı xam neftin fevral ayı üçün fyuçerslərin qiyməti 2,75% qalxaraq 62,82 dollar/barelə bərabər olub.
Əməliyyat nə qədər qanunidir?
TASS yazır ki, generalın öldürüldüyü əməliyyat barədə ABŞ Konqresinə əvvəlcədən məlumat verilməyib və bu da Konqresin səlahiyyətlərinə etinasızlıq kimi qəbul olunur. Nümayəndələr Palatası Xarici İşlər Komitəsinin sədri, Demokrat Partiyası təmsilçisi Eliot Ancelin deyib ki, bu əməliyyat hərbçilər dediyi kimi, müdafiə məqsədi ilə həyata keçirilsə belə qanuna görə prezident Konqresi 48 saat əvvəldən xəbərdar etməlidir.
