Tovuz rayonunun Dondar Quşçu kəndində itkin düşən Nərmin Quliyevanın bir neçə gün əvvəl meyiti tapılıb. İlkin ehtimallara görə o, cinsi zorakılığa məruz qalıb və başından küt alətlə aldığı zərbədən həlak olub.
Nərmin Quliyeva kimdir və necə itib:
Dondar Quşçu kəndində 2010-cu ildə anadan olan Nərmin Quliyeva yaşadığı kənddə 2019-cu il noyabrın 21-i itkin düşüb. Onun anası Aynurə İsmayılovanın sözlərinə görə, N.Quliyeva əmisi Arif Quliyevin gödəkçəsini onlara aparmaq üçün evdən çıxıb. 8-10 metrlik məsafədə yaşayan əmisinə gödəkçəni verəndən sonra o, digər əmisi Lətif Quliyevin evinə gedib. Evlərin arasından keçən yolda N.Quliyeva yoxa çıxıb.
Baş Prokuorluq nə deyir:
Nərminin cəsədi itkin düşəndən təxminən 40 gün sonra, yanvarın 6-ı yanmış vəziyyətdə elə yoxa çıxdığı kənddə tapılıb. Araşdırmalarla onun qəsdən öldürülməsinə kifayət qədər əsaslar olduğu müəyyənləşib. Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə) maddəsi ilə cinayət işi başlanıb.
Elina Hacıyevanın intiharı barədə nələri bilirik, nələri yox
İstintaq araşdırmalar zamanı nələri müəyyənləşdirib:
Nərmin Quliyeva tapılandan 5 gün əvvəl öldürülüb
Kəllə sümüyündə 5 sınıq aşkarlanıb
Ölümünə başından küt alətlə vurulması səbəb olub
Meyit polietilen torbada hadisə yerinə gətirilib və orada yandırılıb
Cəsədin yalnız qurşaqdan aşağı hissəsi yanıb
Dırnaqları kəsilib
Əməliyyat qrupunun qənaəti nədir:
Nərminin dırnaqlarının kəsilməsinin cinsi zorakılıqla bağlı olduğu ehtimal edilir. Məqsəd cinsi zorakılıq zamanı onun müqavimət göstərərək, xəsarət yetirməsinin qarşısını almaq olub.
Nərmin Quliyeva itkin düşəndən sonra necə axtarılıb:
Ailə üzvləri noyabrın 25-dən etibarən Xəzər TV-dəki “Səni axtarıram” verilişində onun axtarışına başlayıb.
Ötən il dekabrın 9-da isə mediada istintaqın irəli sürdüyü ilkin ehtimal dərc olunub. Həmin ehtimala görə, o, yol-nəqliyyat hadisəsinin qurbanı olub. Sürücü yaralıya tibbi yardım göstərmək üçün onu götürüb, ancaq ola bilsin ki, N.Quliyeva yolda ölüb. Bu vəziyyətdə sürücü, çox güman ki, cəsəddən qurtulmaq üçün onu haradasa gizlədib.
Hələlik Nərmin Quliyevanın noyabrın 21-dən etibarən harada saxlandığı və onu kimin qətlə yetirdiyi məlum deyil.
