Bu il keçiriləcək parlament seçkilərində 34 saylı Xətai seçki dairəsindən deputatlığa namizəd, hüquşünas Səməd Rəhimli bu gün Daxili İşlər Nazirliyinə çağrılıb. Bir neçə saat onunla danışmaq mümkün olmayıb.
Hazırda sərbəst buraxılan namizəd deyib ki, əvvəlcə sahə müvəkkili onu görüşə çağırıb, daha sonra həmin görüşdə ona rəhbərlik səviyyəsində görüşün olacağı deyilib.
Mən əvvəl etiraz etdim ki, qeydə alınmış namizədəm belə görüşə getməmək ixtiyarım var. Amma onlar mənlə razılaşmadılar və təkid etdilər. Mən də bu təkid qarşısında razılaşdım ki, gedək. Daha sonra Daxili İşlər Nazirliyinə getdik və həmin müddətdə mən telefondan istifadə edə bilmədim.
Səməd Rəhimli
Namizədin nazirliyə çağırılmasının səbəbi isə onun müsahibələrindən birində polis orqanlarını tənqid etməyi olub.
Nərmin Quliyevanın qətli ilə bağlı verdiyim müsahibə idi və həmin müsahibənin sonunda isə demişdim ki, qanunvercilik vəziyyəti belə cinayətlərin qarşısının alınması və üstünün açılması üçün kifayətdir, amma polis qüvvələri korrupsiyalaşıb, öz işi ilə yox, başqa işlərlə məşğuldur. Bununla bağlı söhbət etdilər və dedilər ki, mənlə razılaşmırlar, polisin fəaliyyəti yerindədir, qaydasındadır, təkmilləşdirməyə çalışırlar. Hesab edirlər ki, bir neçə nəfərin səhvinə görə bütün polis orqanlarını tənqid etmək olmaz.
Mənsə dedim ki, mənim yanaşmam fərqlidir, düşünürəm ki, Azərbaycanda polisin səlahiyyəti çoxdur və bu da korrupsiyalaşmağa gətirib çıxarır.
Səməd Rəhimli
Deputatlığa namizəd hesab edir ki, ümumilikdə tənqid olunduğuna görə polisin həmin adamı çağırıb belə söhbət aparması düzgün deyil.
