Gəncə Şəhər İcra Hakimiyyətinin keçmiş başçısı Elmar Vəliyev və polis əməkdaşına qarşı sui-qəsd törətməkdə ittiham olunan Yunis Səfərovla birlikdə 12 nəfərin növbəti məhkəmə iclası keçirilib. Gəncə Ağır Cinayətlər Məhkəməsinin hakimi Natiq Əliyevin sədrlik etdiyi proses Sabunçu Rayon Məhkəməsində baş tutub.
Məhkəmə iclası zamanı ittiham olunanlardan vəkillər Nazim Musayevin və Cavad Cavadovun vəsadətlərinə baxılıb.
Vəsadətlər nə ilə bağlı olub:
- Mülki Prosessual Məcəllənin ərazi adiyyəti tələbinin pozulması
- Cinayət-Prosessual Məcəllənin “məhkəmə hakiminin prosesin hər hansı iştirakçısı və ya onun qanuni nümayəndəsi ilə qohumluq münasibətinin varsa, hakimin o işə baxıb qərar çıxarması mümkünsüzdür” tələbinin pozulması
Məhkəmə vəsadətləri qəbul edib və baxılması üçün Gəncə Apellyasiya Məhkəməsinə göndərib.
Yunis Səfərov kimdir?
Y.Səfərov 2018-ci il iyulun 3-də Gəncə şəhərində radikal dini dairələri təmsil edən mütəşəkkil dəstə tərkibində İcra Hakimiyyətinin keçmiş başçısı Elmar Vəliyevə qarşı əvvəlcədən planlaşdırılmış sui-qəsd törətməyə cəhd etməkdə ittiham olunur. Hadisə nəticəsində Elmar Vəliyev və polis əməkdaşı xəsarət alıb. 2018-ci il avqustun 28-də prezidentin sərəncamı ilə E. Vəliyev icra başçısı vəzifəsindən azad edilib.
Yunis Səfərova qarşı hansı maddələrlə ittiham irəli sürülüb:
- Azərbaycan Respublikasının konstitusiya quruluşunun zorla dəyişdirilməsinə,
- şəriət qanunlarına əsaslanan idarə üsulunun təşkilinə yönələn terrorçuluq,
- qanunvericiliklə nəzərdə tutulmayan sabit silahlı qrupun yaradılmasına,
- ölkənin hüdudlarından kənarda silahlı birləşmələrdə təlim keçilməsi,
- çoxsaylı odlu silah, döyüş sursatı və partlayıcı qurğuların quldurluq və digər qanunsuz yollarla ələ keçirilərək saxlanılması,
- polis əməkdaşlarının ağırlaşdırıcı hallarda qəsdən öldürülməsinə cəhd edilməsi,
- ayrı-ayrı vəzifəli şəxslərin dövlət xadimləri kimi xidməti fəaliyyətlərinə son qoymaq və bu fəaliyyətə görə qisas almaq məqsədilə terror aktlarına hazırlıq,
- dövlət əleyhinə açıq çağırışlar və törətdikləri sair ağır və xüsusilə ağır cinayət əməllərində ittiham olunur.
