Bu günlərdə Afrikanın cənubunda COVID 19-un yeni növ ştammı aşkarlanıb. Yeni ştamma yunan əlifbasının 15-ci hərfinə uyğun olaraq “Omikron” adı verilib.
Ümumdünya Səhiyyə Təşkilatı (ÜST) Omikron B.1.1.529 ştammını “narahatlıq doğuran variant” kimi dəyərləndirsə də, koronavirusun digər növlərindən daha təhlükəli olması haqda hələlik dəqiq məlumatlı deyil. Qurumun “Omikron” ştammı ilə bağlı yaydığı açıqlamada bildirilib ki, yeni ştammın ilk dəfə aşkarlandığı Cənubi Afrikada yoluxmanın artmasının məhz “Omikron”la bağlı olub-olmadığı tədqiq edilir.
Ştammın yoluxuculuq qabiliyyəti yüksək olsa da, mütəxəssislər hələ ki narahatlığa ciddi əsas olmadığını bildirirlər.
Düşünürəm ki, panikaya ehtiyac yoxdur. Ştama qarşı hər hansı peyvəndin effektiv olmayacağı barədə danışmaq tezdir.
ÜST-ün Rusiyadakı nümayəndəsi Melita Vuynoviç
Avropada ilk yoluxma
Avropada yeni ştamma ilk yoluxma halı Belçikada qeydə alınıb. Daha sonra isə Avstraliya, Danimarka, Fransa, Niderland, Botsvana, Kanada, Almaniya, İtaliya, Çexiya, Böyük Britaniya, Honq-Konq, İsrail və Rusiyada da aşkar edilib.
Qapanma və qadağalar
Artıq bir çox ölkələr “Omikron”un sürətlə yayılmasının qarşısını almaq üçün tədbirlər görməyə başlayıblar.
Avropa İttifaqı, Türkiyə, İsrail, ABŞ və Böyük Britaniya Afrikanın bir sıra ölkələrindən uçuşlara qadağa qoyub.
Birləşmiş Ştatlar məhdudiyyətləri Cənubi Afrikadan başqa Botsvana, Zimbabve, Namibiya, Lesoto, Esvatini, Mozambik və Malaviyə də şamil edir. Prezident Co Bayden bildirib ki, qadağa noyabrın 29-dan qüvvəyə minir.
“Omikron” ştammı səbəbindən Nyu-Yorkda gələn il yanvarın 15-dək fövqəladə vəziyyət elan edilib. Bu barədə ştatın qubernator Keti Havkul fərman imzalayıb.
Yeni vaksin olacaq?
ABŞ və Almaniya yeni ştamma qarşı artıq vaksin hazırmağa başladıqlarını bəyan ediblər. Yeni vaksinlər Birləşmiş Ştatların Novavax əczaçılıq şirkəti və Almaniyanın BioNTech, Johnson & Johnson şirkətləri tərəfindən hazırlanacaq.
Azərbaycanda vəziyyət nə yerdədir?
Milli Hematologiya və Transfuziologiya Mərkəzinin genetika mütəxəssisi Ağarza Ağayev bu gün açıqlama yayaraq Azərbaycanda koronavirusun “Omikron” ştammı aşkarlanmadığını bildirib. O deyib ki, ölkəyə xaricdən daxil olan, həmçinin ölkə ərazisində cluster tipli yoluxma görülən və şübhəli bilinən bütün nümunələr toplanılır və analiz edilir.
