“Almaniya Federal hökuməti insan haqları sahəsində, həmçinin siyasi məhbus məsələlərində istər Azərbaycanı, istər digər Avropa Şurasına üzv ölkələri qaydalara riayət etməyi səsləyir. Amma adını çəkdiyiniz siyasi məhbus Saleh Rüstəmli ilə bağlı məsələnin təfərrüatlarından xəbərdar olmadığımıza görə, dəyərləndirmə apara bilmərəm”.
Bunu Almaniyanın Azərbaycandakı səfiri Volfqanq Maniq Mikroskop Mediaya verdiyi açıqlamasında deyib. Səfir bildirib ki, Azərbaycanda həm qərb qonşusu ilə qarşıdurmalar, həm də insan hüquqları sahəsində çox iş görülməlidir.
“Biz həm federal hökumət, həm də Avropa İttifaqı üzv ölkəsi kimi Azərbaycanı məhz insan haqları sahəsində dəstəkləyəcəyik və inanırıq ki, bu vəziyyət yaxşılaşacaq. Son illərdə Ali məhkəmə tərəfindən insan haqları sahəsində bir çox qanunlar qəbul edilib, ancaq onların tətbiqi ilə bağlı işlər görülməlidir”
səfir əlavə edib.
Saleh Rüstəmli kimdir: Saleh Rüstəmli 1992-1993-cü illərdə Gədəbəy rayon İcra Hakimiyyətinin keçmiş başçısı olub. Saleh Rüstəmovun vəkili Bəhruz Bayramov qeyd edir ki, müvəkkili həbsdə olan AXCP üzvlərinin ailələrinə yardım məqsədilə 5-6 min dollar civarında pul göndərib. Hazırda S.Rüstəmli həbsxanada 27 gündür aclıq aksiyası keçirir.
Onun yaxınları və vəkili bildirib ki, S.Rüstəmli aksiyaya səbəb kimi icrasına başlanan Amnistiya Aktına düşməməsi, qanunsuz olaraq üç ildən artıqdır həbsdə saxlanması və ailəsinin mülkiyyətinin müsadirəsini göstərib.
Nədə ittiham olunub: Saleh Rüstəmli və onunla birlikdə saxlanılan AXCP funksionerləri Aqil Məhərrəmli və Babək Həsənov barəsində 2019-cu il 27 fevralda hökm oxunub. Onlar Cinayət Məcəlləsinin
- 192.3.2 – xüsusilə külli miqdarda gəlir əldə etməklə qanunsuz sahibkarlıq
- 193-1.3.1, 193-1.3.2 – mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma maddələri ilə təqsirli bilinib.
Həbsinə reaskiya: Dekabrın 1-də bir qrup siyasi fəallar Saleh Rüstəmlinin azadlığa buraxılması tələbi ilə aksiya keçirib. Aksiyada 30-a yaxın şəxs saxlanılıb və etirazçılar polis zorakılığına məruz qalıb.
