1 dekabrdan etibarən Naxçıvanda elektrik enerjisi qrafiklə verilməyə başlanıb. Belə ki, Naxçıvan şəhəri xaric, muxtar respublikanın bütün ərazisində işıqlar 3 saatda bir, 1 saatlıq fasilə ilə söndürülür. Naxçıvan şəhərində evlərə işıq verilsə də, küçələrin işıqlandırılması dayandırılıb.
Bu barədə məlumatı Gündəlik Naxçıvan səhifəsi yayıb.
Bildirilir ki, elektrik qıtlığı səbəbindən zavod və fabriklər bağlanıb. Qıtlığın səbəbi açıqlanmasa da, bu, əhali arasında ciddi narazılıq yaradır. Babək rayon sakini Mustafa Orucov deyir ki, işıqların kəsilməsi axşamlar çətinlik yaradır.
Blokadada olsaq da, uzun illərdi ki, Naxçıvanda işıq problemi yox idi. İndi lap 1990-cı illəri xatırladıq. Gündüz birtəhər ötüşmək olar. Axşamlar çətinlik çəkirik. Uşaqlar dərslərini telefon işığında hazırlayır.
Mustafa Orucov
Şərur rayon sakini Teymur Alışov deyir ki, onlara elektrikə qənaət etmək tapşırılıb:
Səbəbini açıqlamırlar ki, bilək nə edirik. Son illər tez-tez yeni elektrik stansiyası tikməkləri ilə öyünürdülər. Sevinmişdik ki, hər şey gözəl olacaq. İndi də deyirlər ki, enerjiyə qənaət etmək lazımdır.
Teymur Alışov
Naxçıvan şəhərindəki fabriklərin birində işləyən, təhlükəsizliyi baxımından adının çəkilməsini istəməyən şikayətçi deyir ki, iki gündür onlara işə gəlməmək tapşırılıb.
Dedilər işıq yoxdur, işlərimiz dayanır, işığı əhaliyə güclə çatdırırıq. İşimizin nə vaxt açılacağını bilmirik. Dedilər ki, işləmədiyiniz günlərə maaş da verilməyəcək. Oturmuşuq evdə. Belə davam etsə, uşaqlarımız ac qalacaq.
Şikayətçi
Babək Rayon işıq İdarəsindən işıqların fasilələrlə söndürülməsini təsdiqləsələr də, bunun səbəbi haqda məlumatsız olduqlarını deyiblər.
Naxçıvan şəhər icra hakimiyyətindən isə, elektriklə bağlı heç bir problem olmadığını, şəhərdə əhaliyə kəsintisiz işıq verildiyini bildiriblər.
