Siyasi məhbus, Gədəbəyin sabiq icra başçısı Saleh Rüstəmli artıq 31 gündür ki, aclıq aksiyası edir. O, aksiyanın 10-cu gündən etibarən sudan da imtina edərək quru aclığa başlayacağını bildirmişdi.
Bu gün yaxınları S.Rüstəmli ilə görüşərək quru aclığa başlamamaq üçün ona müraciətləri çatdırıblar. O, quru aclığa keçmək qərarını dəyişsə də, aclıq aksiyasını sonadək davam etdirəcəyini bildirib.
Bu haqda Saleh Rüstəmlinin oğlu sosial şəbəkədə məlumat paylaşıb:
Əmimgil atamla görüşüb, ona Şahin bəy və digər dostların xahiş etməsini, Ağdaşda aclıq edən həkimin “Saleh quruya keçsə mən də keçəcəm” deməsini, rayondan bir-neçə nəfərin atam quruya keçən kimi onların da quru aclığa başlayacaqlarını dediklərini çatdırıblar. Bunları nəzərə alaraq atam bu gün quru aclığa keçməməyə razılaşıb. Amma deyib ki, “quru aclığa keçəcəm” deyəndə kimisə təhtid etmir, sadəcə artıq bir aydır davam edən aclığın nəticəsində başlayan şiddətli ağrılara dözə bilmir, gecələr yata bilmir, çətinliklə nəfəs alır, gün ərzində dəfələrlə huşunu itirir. “Yaxşı, bu gün quru aclığa keçmirəm, amma aclığı dayandırası deyiləm, ya quruya keçib öləcəm, ya belə öləcəm, sadəcə daha uzun və zülmlü olacaq bu ölüm” deyib.
Sayqın Rüstəmli
Saleh Rüstəmli kimdir: AXC-Müsavat hakimiyyəti dövründə Gədəbəy rayonunun icra başçısı olub. O, bir müddətdir Rusiyada yaşayırdı və 2018-ci ildə Bakıya gələn zaman saxlanılıb.
Nədə ittiham edilir: Saleh Rüstəmli AXCP-yə pul yardımı etməkdə və qeyri-qanuni sahibkarlıqla məşğul olub, gəlirlərini dövlətdən gizlətməkdə ittiham olunaraq həbs edilib. Bakı Ağır Cinayətlər Məhkəməsinin hökmü ilə 7 il 3 ay müddətinə azadlıqdan məhrum edilib.
Hansı reaksiyalar olub: 1 dekabrda Bakının Fəvvarələr meydanında Saleh Rüstəmlinin azadlığa buraxılması tələbi ilə “Saleh Rüstəmliyə azadlıq!” şüarlı aksiya keçirilib.
