7 dekabrda Ermənistan parlamentində keçirilən iclasda müxalif deputatların 3 köməkçisi zorakılığa məruz qalıb. OC Media yazır ki, “Ermənistan” fraksiyasından olan deputat İşxan Saqatelyanın köməkçisi Syune Qevorqyan hadisənin şahidi olduğunu bildirib:
Dəhlizlə gedərkən hakim partiyadan olan vitse-spiker Ruben Rubinyanın kabinetindən səslər eşitdim. Yaxınlaşaraq gördüm ki, hakim partiyadan olan bir neçə deputat müxalif deputatların üç köməkçisini döyür.
Syune Qevorqyan
Qevorqyan iddia edib ki, köməkçiləri döyənlər arasından baş nazir Nikol Paşinyanın qaynı Hraçya Akopyan, Vaaqn Aleksanyan və Sisak Qabrielyanı tanıyıb. Deputatın köməkçisi onu da qeyd edib ki, hadisə zamanı mühafizə xidmətinin əməkdaşları orada olsalar da, heç bir tədbir görməyiblər.
Hraçya Akopyan mətbuata verdiyi ilk şərhdə fiziki mübahisə baş verdiyini təsdiqləsə də, özünün iştirakını inkar edib:
Mən gələndə dava artıq başlamışdı. Kimin günahkar olduğunu bilmirəm.
Hraçya Akopyan
Akopyan başqa bir açıqlamasında bildirib ki, müxalifətin köməkçiləri ona və deputat Sisak Qabrielyana qarşı hörmətsizlik ediblər.
