Ölkənin vətəndaş cəmiyyəti fəallarından ibarət bir qrup Saleh Rüstəmliyə görə beynəlxalq təşkilatlara müraciət edib. Onlar uzun müddətdir aclıq edən siyasi məhbusu dəstəkləməyə çağırıblar:
“Biz vətəndaş cəmiyyəti nümayəndələri, aclıq edən bir siyasi məhbusun həyatının təhlükədə olmasından, bu pis örnəyin işığında “siyasi məhbus” probleminin illərdir həll edilməməsindən, təməl hüquq və azadlıqların sistemli hala çevrilən pozuntularından ciddi narahatıq.
Saleh Rüstəmli qanunsuz və əsassız hökmlə 7 il 3 ay müddətinə azadlıqdan məhrum edilib.
Üzləşdiyi qanunsuzluqlara etiraz olaraq 31 gün əvvəl aclığa başlayan, həmin vaxt həkim nəzarətinə verilməsi gözlənilsə də, 4 günlüyə cərimə təcridxanasına salınan S.Rüstəmli hazırda aclığı davam etdirir. O, 15 kq arıqlayıb, halsızlışıb, yeriməkdə, ayaq üstə durmaqda, danışmaqda çətinlik çəkir. Saleh Rüstəmli keyifyyətli həkim müayinəsiylə təmin edilməyib, formal xarakterli müayinələr isə effektli deyil.
Biz bütün tərəqqipərvər qurumalardan, ölkələrdən, fərdlərdən, o cümlədən də, sizdən öz mümkün səylərinizi bizdən əsirgəməmənizi, təməl insan haqlarının təmin olunması ilə bağlı üzərinə götürdüyü öhdəlikləri Azərbaycan hökumətinə xatırlatmanızı, S.Rüstəmlinin məruz qaldığı qanunsuzluqların nəticələrini aradan qaldırmaqda faydalı ola biləcək bütün mümkün addımları atmanızı rica edirik”.
Qeyd: Müraciəti 100-ə yaxın fəal, jurnalist, hüquq müdafiəçisi, vəkil, ekspert və digər şəxslər imzalayıb.
Sezgin Rüstəmovun atası haqda bu günə olan məlumatı:
Atamın vəziyyəti pisləşib, xüsusi nəzarətə götürülüb.
Sezgin Rüstəmov
