Penitensiar Xidmət siyasi məhbus Saleh Rüstəmovun səhhəti ilə bağlı məlumat yayıb. Qurumun yaydığı açıqlamada bildirilib ki, sosial şəbəkələrdə Saleh Rüstəmovun səhhəti ilə bağlı həqiqəti əks etdirməyən məlumatlar dərc edilib:
Hazırda Penitensiar Xidmətin Müalicə müəssisəsində saxlanılan Gədəbəy Rayon İcra Hakimiyyətinin sabiq başçısı Saleh Rüstəmov qida qəbulundan imtina etməsi ilə bağlı səhhəti daim həkim nəzarətindədir və dəstəkləyici müalicə tədbirlərinə cəlb olunub. Onunla dəfələrlə psixoloji-profilaktik, fərdi-tərbiyəvi, səhhəti ilə əlaqədar maarifləndirici-izahedici söhbətlər aparılıb, qida qəbulundan imtinanın verə biləcək fəsadları ətraflı izah edilib.
Penitensiar Xidmət
Qurumun məlumatında o da qeyd edilib ki, Saleh Rüstəmova müntəzəm olaraq hüquqi yardım göstərən vəkili və yaxın qohumları ilə görüşməsinə, telefonla danışmasına şərait yaradılıb:
Ombudsman aparatının əməkdaşları, vətəndaş cəmiyyəti institutları və hüquq müdiəçiləri, Beynəlxalq Qırmızı Xaç Komitəsi Bakı ofisinin nümayəndələri tərəfindən də qəbul edilərək onunla izahedici söhbətlər aparılıb. Ona Xidmətin psixoloqları tərəfindən psixoloji yardım göstərilib, eyni zamanda respublikada səfərdə olan türkiyəli psixoloqlarla görüşünə şərait yaradılıb. Aparılmış söhbətlər zamanı onun psixi sağlamlığında pozuntu müəyyən edilməyib, hər hansı digər mənfi əlamətlər izlənilməyib.
Penitensiar Xidmət
4 dekabrda isə Saleh Rüstəmovun bacısını onunla görüşməyə icazə verməyiblər
Siyasi məhbusun oğlu daha öncə atasının vəziyyəti ilə bağlı bunları yazıb:
Atam üçün ayrıca otaq düzəltmişdilər, palata deyil. Bir aydan artıq orada tək qalırdı, indi yanına məhbus salıblar ki, qida qəbul edəndə atama pis təsir etsin.
Sezgin Rüstəmli
Saleh Rüstəmov bu gün aclıq aksiyasının 35-ci günündədir.
