Naxçıvan Dəmir Yolları MMC-nin işçiləri 5 aydan çoxdur ki, maaşlarını ala bilmirlər. Bu haqda “Gündəlik Naxçıvan”a bir qrup dəmiryolçu məlumat verib. Onların sözlərinə görə, buna səbəb kimi maliyyə çatışmazlığı göstərilir. Şikayətçilərdən M. Əliyev bildirib ki, uzun müddətdir maaşlarını ala bilmədiklərindən çoxlu maliyyə problemləri ilə üzləşiblər:
Deyirlər Zəngəzur dəhlizi açılacaq, Bakıya qatarlar da işləyəcək. Bu lap yaxşıdır. Ancaq necə olur ki, bu proyektə pul tapa bilirlər, biz dəmiryolçuların maaşını verə bilmirlər? Dəmiryolçu var ki, maaş almadığını görə, artıq evində çörək də yoxdur. Dükanlar nisyə vermirlər. Beş aydır gözləyirlər ki, köhnə borclarını versinlər. Mənim uşağım xəstədir, evin də tək işləyəniyəm. İndi pul yoxdur ki, müalicə davam etsin. Müalicə nədir, heç normal yeyəcək tapa bilmirik. Soruşuruq, deyirlər maliyyə çatışmazlığı var. Belədirsə, başqaları niyə alır maaşlarını?
M. Əliyev
Tələbə atası olan digər şikayətçi S. Əsgərov artıq övladının təhsil haqqını da ödəyə bilmədiyini deyib:
Övladıma son xəbərdarlıq edilib ki, təhsil haqqını ödəsin, yoxsa universitetdən qovacaqlar. Mən hər ay maaşımı bir hissəsini ayırırdı ki, yığım, uşağın təhsil haqqını ödəyim. 5 aydır maaş ala bilmirik deyə, həmin pulu da xərcləmişik, üstəlik borclanmışıq da.
S. Əsgərov
Naxçıvan Maliyyə Nazirliyinin xəzinə şöbəsinin əməkdaşı Nurlan Hacıyev “Gündəlik Naxçıvan”a bildirib ki, maaşların gecikməsinə səbəb, struktur dəyişikliyi olub:
“Vəsaitlər əvvəllər Bakıdan ayrılırdı, qurum daha ordan maliyyələşmir. Gecikmə buna görə baş vermişdi. Artıq mşçilərin maaşı üçün vəsait ayrılıb. Onlar 3-4 gün içərisində bütün gecikmiş maaşlarını ala biləcəklər”
