Qazaxıstanda maye qazın dəyərinin kəskin artmasına görə yeni ilin ilk günlərindən Almatı, Janaozen, Manqistau, Aktau şəhərləri başda olmaqla bir çox bölgələrdə etiraz aksiyaları başlayıb. Hökumət qiymətləri aşağı salacağını bəyan etsə də, etirazlar dayanmayıb. Almatının mərkəzində etirazçılarla polis arasında toqquşmalar yaşanıb.
Hökumətin baş verənlərə reaksiyası:
- Qazaxıstan hökuməti ölkəni bürüyən kütləvi etirazlar fonunda istefa verib, prezident Kasım-Jomart Tokayev istefa ilə bağlı fərmanı imzalayıb.
- Kasım-Jomart Tokayev ölkənin ən böyük şəhəri Almatı, paytaxt Nur-Sultanda və Manqistau vilayətində yanvarın 19-dək fövqəladə vəziyyət elan edib. Almatıya giriş və çıxış qadağan edilib.
- Ölkədə axşam saat 23:00-dan səhər saat 7:00-a qədər komendat saatı tətbiq olunacaq. Kütləvi tədbirlərin keçirilməsi qadağan edilib, insanların və nəqliyyat vasitələrinin hərəkəti məhdudlaşdırılıb.
- Manqistau vilayətinin Janaozen rayonundakı Qaz Emalı Zavodunun direktoru Narkbergen Tulepov qazın qiymətini əsassız olaraq bahalaşdırmaqda ittiham olunaraq saxlanılıb.
Qazaxıstanda son vəziyyət:
- Bir sıra sərnişin və yük qatarının reysləri təxirə salınıb.
- Almatı İcra Hakimiyyətinin, şəhər prokurorluğunun binaları, hakim “Nur Otan” Partiyasının Auezov rayon şöbəsinin qərargahı yandırılıb.
- Almatıdakı iğtişaşlar nəticəsində 33 xüsusi təyinatlı avtomobil dağıdılıb və yandırılıb. Onlardan 16-sı polis, 7-si təcili tibbi yardım, 2-si yanğınsöndürən, 7-si yük maşını, 1-i yanacaqdaşıyan avtomobildir.
- İğtişaş zamanı 300-ə yaxın müəssisə, o cümlədən 120 dükan, 100-dən artıq ofis və 80 ictimai iaşə obyekti dağıdılıb.
- Etirazların fonunda ölkədə internetə çıxışda da problemlər yaranıb. Vətəndaşlar bildiriblər ki, Almatı və Nur-Sultanın bəzi bölgələrində internet dayanıb, “WhatsApp” və “Telegram” işləməyib.
