Lənkəran Dövlət Universitetində təhsil alan bir qrup tələbə imtahan vaxtının azaldılmasından şikayət edir. Universitetdə yazılı imtahanın vaxtı 3 saatdan 2 saat yarıma endirilib. Universitetin tələbələrindən olan Şəhla Kərim deyir ki, yarım saat elə vərəqələrin paylanması və imtahana hazırlığa sərf olunur.
Hələ imtahanlar başlamayıb, universitetin despotik qaydalarından boğaza yığılmışam. İndi öyrənmişəm ki, bütün universitetlərdə imtahan müddəti 3 saat olmasına baxmayaraq, Lənkəran Dövlət Universitetində 2 saat yarımdır. Üstəlik, bir sual üçün 2 səhifə yer ayrılır, onun birini boş qoysan, balın aşağı düşür.
Şəhla Kərim
Mikroskop Media şikayətlə bağlı LDU və Təhsil Nazirliyi ilə əlaqə saxlayıb. Universitet zənglərə cavab verməsə də, nazirlik rəsmisi Cəsarət Valehov bildirib ki, bu qərar universitetə bağlıdır və çox güman ki, hansısa əsasla edilib:
Ümumi qaydaları Təhsil Nazirliyi müəyyən edir. Lakin universtetlərdə olan ayrı-ayrı qaydalar var ki, bu, universitetin daxili qərarları əsasında olur. İmtahan saatlarının müəyyən edilməsi, suallar, imtahanın keçirilmə qaydasını universitetin elmi şurası müəyyən edir. İnanmıram ki, universitet tələbənin ziyanına qərar qəbul etsin. Əgər yarım saat qısaldılma varsa, yəqin ki, suallara cavab vermə müddətinin uyğunluğu faktı nəzərə alınıb.
Cəsarət Valehov
Yazılı imtahanın vaxtını azaldan təkcə Lənkəran Dövlət Universiteti deyil. Azərbaycan Dövlət Pedaqoji Universiteti də imtahanın vaxtını 2 saat 30 dəqiqəyə endirib.
