Ermənistanın Mülki Aviasiya Komitəsi Türkiyənin “Pegasus Airlines” aviaşirkətinə İstanbul-Yerevan-İstanbul marşrutu üzrə uçuşlar həyata keçirməyə icazə verib. Bu barədə Ermənistan mediasına ölkənin Ərazi İdarəetmə və İnfrastruktur Nazirliyinin mətbuat xidmətindən məlumat verilib.
Qeyd: Ermənistanın “Flyone Armenia” aviaşirkəti də Yerevan-İstanbul-Yerevan reysləri üçün icazə alıb. “Flyone Armenia” 2015-ci ildən sonra Türkiyəyə uçuşlar həyata keçirməyə başlayan ilk Ermənistan aviaşirkəti olacaq.
Ermənistan-Türkiyə arasında diplomatik münasibət necədir:
- Ermənistanla Türkiyə arasında diplomatik əlaqələr yoxdur.
- 2009-cu ildə Sürixdə iki dövlətin xarici işlər nazirləri diplomatik münasibətlərin qurulması, münasibətlərin prinsipləri haqqında protokollar imzalayıb. Lakin bu sənədlər hər iki dövlət tərəfindən ratifikasiya olunmayıb.
- 2018-ci il martın 1-də Ermənistan protokolları ləğv etdiyini açıqlayıb.
- 2021-ci ilin sonu hər iki ölkə münasibətlərin normallaşdırılması üçün nümayəndələr təyin edib. Ankaranı Türkiyənin ABŞ-dakı keçmiş səfiri Serdar Kılıc, Ermənistanı isə parlamentin sədr müavini Ruben Rubinyan təmsil edir.
