Qazaxıstanın eks-prezidenti Nursultan Nazarbayevin kiçik qızı Aliyə Nazarbayeva ölkədən 300 milyon dollardan çox pul çıxarıb və pulun bir hissəsini xaricdə daşınmaz əmlak almağa xərcləyib.
Məlumatı “The Telegraph” nəşri Nazarbayevanın maliyyə məsləhətçilərinə qarşı qaldırdığı iddia əsasında dərc edib. Britaniya nəşrinin yazdığına görə, 41 yaşlı Nazarbayeva iki məsləhətçini dələduzluqda və vəsaitləri mənimsəməkdə ittiham edib. O, London məhkəməsi vasitəsilə onlardan 165 milyon funt sterlinq tələb edib, lakin mübahisə barışıq sazişi ilə yekunlaşıb.
Aliyə Nazarbayeva maliyyə məsləhətçilərindən birinə deyib ki, 2006-cı ildə bəzi Qazaxıstan şirkətlərinin səhmlərini 325 milyon dollara satıb.
Aliyə Nazarbayevanın digər xərcləri:
- “Challenger Bombardier” model şəxsi təyyarə (25 milyon dollar)
- İsveçrənin “CBH Bank”ın səhmlərinin 51%-i (108 milyon dollar)
- Londonun şimalında malikanə (11,8 milyon dollar)
- Dubayda bir neçə daşınmaz əmlak və villa (14 milyon dollar)
Nəşr qeyd edir ki, bu malikanəni İngiltərədə vətəndaşlıq əldə etmək üçün alıb və qeyd edilən əməliyyatların hamısı 2016-cı ildən əvvəl həyata keçirilib.
