Avropa İnsan Haqları Məhkəməsi (AİHM) 13-də Azərbaycandan göndərilmiş 15-dən çox ərizə üzrə 6 yekun qərar və qərardadlarını elan edib. Qərara əsasən, Azərbaycan hökuməti ərizəçilərə ümumilikdə 126 min avrodan artıq təzminat ödəməlidir. AİHM-ə şikayət göndərənlər arasında əcnəbi vətəndaşlar da var.
Şikayətlər hansı əsaslarla edilib:
- Şəxsi həyata hörmət hüququna müdaxilə;
- Hökumət təşkilatlarının dövlət qeydiyyatına alınmasından imtina olunması;
- Mülkiyyət hüququnun pozuntusu;
- Məhkəmə qərarlarının icra edilməməsi.
Şikayətçilərin hər birinə ayrılıqda 2100, 4750, 11 000 avro və 1750 avro ödəniləcək.
Azərbaycana qarşı iddia qaldıranlardan biri də jurnalist Tural Cəfərov olub. Onun iddiası ləyaqət və nüfuzuna xələl gətirilməsi, şəxsi həyata hörmət və ifadə azadlığı hüquqlarının pozulması ilə bağlı olub. Belə ki, illər əvvəl jurnalist konfransa qatılan zaman oteldə onun şəxsi və intim xarakterli video görüntüləri çəkilib, internetdə və özəl bir telekanalda yayımlanıb.
Avropa İnsan Haqları Məhkəməsi Tural Cəfərovun iddiasını təmin edib, hökumət ona 8300 avro təzminat ödəməlidir.
