Yanvarın 14-də Kiyevə işgüzar səfər edən prezident İlham Əliyev ukraynalı həmkarı Vladimir Zelenski ilə təkbətək görüşüb. Daha sonra isə prezidentlər və hər iki ölkənin nümayəndə heyətlərinin geniş tərkibdə toplantısı baş tutub. Daha sonra Azərbaycan-Ukrayna arasında 6 hökumətlərarası sənəd imzalanıb.
Görüşdə imzalanan sənədlər hansılardır:
- İlk sənəd prezidentlər arasında imzalanıb;
- Azərbaycanın energetika naziri, Hökumətlərarası Komissiyanın həmsədri Pərviz Şahbazov və Ukraynanın baş nazirinin müavini, Hökumətlərarası Komissiyanın həmsədri İrina Vureşyuk arasında imzalanan qida təhlükəsizliyi sahəsində əməkdaşlıq haqqında saziş;
- Azərbaycanın iqtisadiyyat naziri Mikayıl Cabbarov və Ukraynanın baş nazirinin müavini, Hökumətlərarası Komissiyanın həmsədri İrina Vureşyuk arasında imzalanan ikitərəfli ticarətdə təcili əməkdaşlıq haqqında Anlaşma Memorandumu;
- İqtisadiyyat naziri Mikayıl Cabbarov və Ukraynanın aqrar siyasət və ərzaq naziri Roman Leşenko arasında imzalanan aqrar sahədə əməkdaşlıq haqqında Anlaşma Memorandumu;
- İqtisadiyyat naziri, Azərbaycan Dövlət Neft Şirkətinin (SOCAR) Müşahidə Şurasının sədri Mikayıl Cabbarov və Ukraynanın “Naftoqaz” Milli Səhmdar Şirkətinin İdarə Heyətinin sədrinin imzaladığı enerji təchizatı sahəsində əməkdaşlıq haqqında Anlaşma Memorandumu;
- İqtisadiyyat naziri Mikayıl Cabbarov və Ukraynanın Geodeziya, Kartoqrafiya və Kadastr üzrə Dövlət Xidməti vəzifəsini icra edən Sergey Zavatskiy arasında imzalanan Torpaq münasibətləri, dövlət torpaqlarının idarə edilməsi və Dövlət torpaq kadastrı sahəsində haqqında Anlaşma Memorandumu.
Görüşün sonunda İlham Əliyev və Vladimir Zelenski mətbuata birgə bəyanatlarla çıxış ediblər.
İlham Əliyev bəyanatlarında nələr deyib:
- Bu gün imzalanan sənədlər ölkələrimizin yaxınlaşmasına yalnız töhfə verəcək;
- Azərbaycan ilə Ukrayna arasında əməkdaşlığın inkişafı üçün çoxlu imkanlar var;
- Ukrayna ilə Azərbaycan hər zaman bir-birini dəstəkləyir və bu gün sənədlərin imzalanması bu dəstəyin daha bir sübutudur;
- Biz bütün istiqamətlər üzrə işləməyə hazırıq.
Vladimir Zelenski bəyanatlarında nələr deyib:
- Azərbaycan ilə Ukrayna arasında güclü strateji tərəfdaşlıq qurulub;
- İmzaladığımız Birgə Bəyannamə “bizim baxışlarımızın oxşarlığını” simvolizə edir;
- Prezident İlham Əliyevlə görüşdə Ukrayna, Azərbaycan, Gürcüstan və Moldovanı birləşdirəcək nəqliyyat dəhlizinin yaradılması məsələsi qaldırılıb.
